«Jańa Ózbekstan Olimpiya shıńları» sport jarıslarınıń 2-basqıshı jeńimpazları sıylıqlandı

Nókis qalasındaǵı Jaslar maydanshasında «Jańa Ózbekstan Olimpiya shıńları» sport jarıslarınıń 2-basqıshı – «Qaraqalpaqstan Respublikası Joqarǵı Keńesi Baslıǵı Olimpiadası hám Paralimpiadası»nıń sıylıqlaw máresimi ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jeńimpazlıqtı qolǵa kirgizip, Ózbekstan Respublikası basqıshına jollama alǵan barlıq jaslardı qutlıqladı.

Atap ótilgenindey, sońǵı jılları barlıq tarawlar qatarında dene tárbiya hám sporttı rawajlandırıwǵa, jaslardı sportqa keńnen qamtıp alıwǵa, Olimpiya hám milliy sport túrlerin rawajlandırıwǵa ayrıqsha itibar qaratılıp, bul baǵdarda keń kólemli ilajlar ámelge asırılıp atır. Húrmetli Prezidentimizdiń baslaması menen ótkerilip atırǵan «Jańa Ózbekstan Olimpiya shıńları» mine usı baǵdardaǵı iygilikli islerden sanaladı.

Usı jılǵı jarıslardıń birinshi basqıshında 13 sport túri boyınsha 23 mıńǵa jaqın jaslar qatnasqan bolsa, ekinshi basqısh juwmaǵı menen 3 mıńǵa jaqın qatnasıwshı arasınan 350 den aslam sportshı-jaslar «Prezident Olimpiadası»na jollamanı qolǵa kirgizdi.

Eń baslısı, «Prezident Olimpiadası» jaslar ushın tek ǵana bellesiwler maydanı emes, shın mánisinde haqıyqıy sport hám doslıq bayramına aylanıp úlgerdi.

Jeńimpazlar múnásip xoshametlenip, bunnan soń ilaj kórkem óner hám mádeniyat xızmetkerleri atqarıwındaǵı koncert bagdarlaması menen dawam etti.