Tórtkúlde “Esar Jayhun shamollari” dástúriy qosıqshılıq tańlawına start berildi

Milliy qosıqshılıq ónerin qásterlep saqlaw, jas talant ielerin qollap-quwatlaw hám tákirarlanbas kórkem óner ǵayratkeri Otajan Xudoyshukurov jaratqan mektepti rawajlandırıw maqsetinde Tórtkúl rayonında “Esar Jayhun shamollari” dástúriy qosıqshılıq tańlawı baslandı.

Ilajdıń ashılıw máresiminde Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov hám belgili mádeniyat xızmetkerleri shıǵıp sóylep, kórkem óner sheberleriniń dástúrlerin dawam ettiriw hám jańa hawazlardı jaratıwdıń áhmietine toqtap ótti.

Ashılıw bólimi el súygen qosıqshılardıń nama hám qosıqları menen bayram baǵdarlamasına aylanıp ketti.

Tańlawda mámleketimizdiń kópshilik aymaqlarınan kelgen 60 qa shamalas jas hám úmitli atqarıwshılar Otajan Xudoyshukurov repertuarındaǵı hám milliy klassikalıq qosıqlardı atqarıp, óz sheberliklerin kórsetti.

Tańlaw jeńimpazları hám sıylı orın ieleri búgin rayonda jańadan boy tiklegen Otajan Xudoyshukurov atındaǵı amfiteatrdıń saltanatlı ashılıw máresiminde múnásip sıylıqlanadı.