Tórtkúl rayonında jańa kárxana paydalanıwǵa tapsırıldı

Usı jıldıń 19-iyun kúni Tórtkúl rayonında sanaatımızdı rawajlandırıwda hám ekonomikamızdı jáne de bekkemlewde áhmietli orın tutatuǵın «Degore-glass T» kárxanasınıń ashılıwına arnalǵan ilaj bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jańa kárxananıń paydalanıwǵa tapsırılıwı múnásibeti menen jıynalǵanlardı qutlıqladı.

Elimizde húrmetli Prezidentimizdiń ayrıqsha itibarı menen keń kólemli jańalanıwlar hám ózgerisler júz bermekte.

Qaraqalpaqstanda isbilermenlikti rawajlandırıw boyınsha jaratılǵan imkaniyatlar nátiyjesinde búgin Tórtkúl rayonında shiyshe ıdısların qayta islew joybarı ámelge asırıldı. Nátiyjede jılına 4,5 million dana ónimler islep shıǵarılıwı jolǵa qoyılıp, 80 nen aslam jańa jumıs orınları jaratıldı.

Álbette, bul kárxana elimizdiń ekonomikasın bekkemlew hám xalqımızdıń abadanlıǵı jolında uzaq jıllar dawamında xızmet etedi.

Ilaj dawamında Joqarǵı Keńes Baslıǵı kárxana jumısları menen jaqınnan tanıstı.