Jańa Amfiteatrdıń paydalanıwǵa tapsırılıwı Tórtkúl rayonı xalqı ushın bayram saltanatına aylandı

Tórtkúl rayonında jańa amfiteatrdıń paydalanıwǵa tapsırılıwı hám milliy qosıqshılıq ónerimizde óshpes iz qaldırǵan biytákirar hawaz iesi Otajon Xudoyshukurovtıń esteligine arnap ótkerilgen «Eser Jayhun samalları» respublikalıq tańlawı jeńimpazların sıylıqlawǵa arnalǵan ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı rayon orayında jańadan boy tiklegen sawlatlı imarattıń paydalanıwǵa tapsırılıwı menen rayon xalqın qutlıqladı hám tańlaw jeńimpazların sıylıqladı.

Atap ótiw orınlı, húrmetli Prezidentimizdiń Qaraqalpaqstanǵa saparı dawamında ataqlı xosh hawaz qosıqshımız Otajon Xudoyshukurovtıń atına Tórtkúl rayonında Amfiteatr qurıw boyınsha bildirilgen usınıs qollap-quwatlanıp, anıq wazıypalar belgilep berilgen edi.

Usı tiykarda 13 milliard sum qarjı tiykarında 2000 orınlı Amfiteatr qurılıp, paydalanıwǵa tapsırıldı hám rayon xalqınıń kóp jıllıq arzıw-nietleri shınlıqqa aylandı.

Áhmietli tárepi, endigiden bılay rayondaǵı barlıq úlken mádeniy ilajlar hám bayram saltanatları usı jerde ótkeriledi.

Búgingi ótkerilgen ashılıw saltanatında «Eser Jayhun samalları» tańlawı jeńimpazların sıylıqlaw máresiminiń ótkeriliwi ilajǵa jáne de kóterińki ruwx baǵıshladı.

Ashılıw saltanatı kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.