Nókis qalasında Jaslar forumınıń ashılıw saltanatı ótkerildi

Búgin Nókis qalasındaǵı «Aq quw» kompleksinde jaylasqan, kóp milletli xalqımızdıń doslıq simvolına aylanǵan «Qara úy»de «Aymaqlıq elektr tarmaqları» jámieti baslaması menen «Bir Watan, bir xalıq bolıp, jańa ómir hám keleshek jaratamız!» súreni astında ótkerilip atırǵan jaslar forumınıń ashılıw saltanatı ótkerildi.

Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, «Aymaqlıq elektr tarmaqları» jámieti baslıǵı A.Askarov, energetika tarawı sistemasında jumıs alıp barıp atırǵan jaslar qatnastı.

Atap ótilgenindey, sońǵı jılları jaslarǵa bolǵan itibar mámleketlik siyasattıń baslı baǵdarlarınıń birine aylanıp, bul baǵdarda keń kólemli ilajlar dawam ettirilmekte.

Búgingi baslanıp atırǵan forum da mine usınday iygilikli islerdiń dawamı bolıp, jaslar arasında doslıq hám awızbirshilik qatnasıqların jánede bekkemlewde, olardıń óz-ara pikir almasıp, tájiriybe arttırıwında hám qábiletin júzege shıǵarıwında áhmietli maydan bolıp xızmet etedi.

Bunnan soń arnawlı pavilonda mámleketimizdiń barlıq wálayatlarınan kelgen taraw wákilleriniń aymaqlıq ózgeshelikleri sáwlelengen kórkem shıǵıwları tamashalandı.