Sharwashılıq tarmaǵındaǵı xojalıqlar hám isbilermenler menen ushırasıw ótkerildi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev sharwashılıq tarmaǵında jumıs alıp barıp atırǵan fermer xojalıqları basshıları hám isbilermenler menen ushırastı.

Onda dáslep Joqarǵı Keńes Baslıǵı húrmetli Prezidentimiz basshılıǵında isbilermenlikti qollap-quwatlaw, usı qatarda awıl xojalıǵı hám sharwashılıqtı rawajlandırıwǵa qaratılıp atırǵan itibar hám jaratılıp berilip atırǵan imkaniyatlar haqqında keń túrde atap ótti.

Sonday-aq, Qaraqalpaqstan ushın óz aldına qabıl etilgen qarar hám pármanlar tiykarında berilgen jeńillikler, olardan paydalanıw máselelerine de itibar qaratıldı.

Ótkerilgen ushırasıw dawamında sharwashılıqtı, sonıń ishinde qusshılıq hám balıqshılıqtı rawajlandırıw baǵdarınsha fermer xojalıqları hám isbilermenlerdiń pikir-usınısları tıńlandı.

Sonıń menen birge, xalqımız dasturxanına arzan hám sapalı gósh, sút hámde qusshılıq ónimlerin jetkerip beriw oǵada áhmietli ekenligi ayrıqsha tilge alındı.

Bunnan tısqarı, tarmaqtı rawajlandırıw baǵdarında ele de sheshimin kútip turǵan máseleler belgilep alındı.