Baspasóz hám ǵalaba xabar quralları xızmetkerlerine

Qádirli doslar!

Bárinen burın sizlerdi 27-iyun - Baspasóz hám ǵalaba xabar quralları xızmetkerleri kúni múnásibeti menen qızǵın qutlıqlaymız.

Jámietimizde demokratiyalıq qádiriyatlardı qarar taptırıw, puqaralarımızdıń málimleme tarawındaǵı konstituciyalıq huqıqların támiyinlew, dúnyada hám mámleketimizde júz berip atırǵan sociallıq-siyasiy processler, waqıya-hádiyseler haqqında operativ hám durıs maǵlıwmatlardı jetkeriwde siz, ǵalaba xabar kuralları xızmetkerleriniń pidáyi miynetińizdi xalqımız jaqsı biledi hám qádirleydi.

Sizlerdiń miynetlerińiz sebep, mámleketimiz ǵalaba xabar quralları xalqımız turmısına  jaqın bolıp, elimizdiń jańa demokratiyalıq kórinisin qáliplestiriwde oǵada áhmietli orın iyelemekte.

Biz jámietimizde ashıq-aydınlıqtı támiyinlewde, ómir hám kásiplik tájiriybeńizdi jaslarǵa úyretip, zamanagóy pikirleytuǵın, Watan hám xalqımızdıń mápin muqaddes dep bilgen salamat hám kámil áwladtı tárbiyalawda sizlerdiń miynetińizge súenemiz.

Sizlerdi Baspasóz hám ǵalaba xabar quralları xızmetkerleri kúni menen jáne bir márte qutlıqlap, bársheńizge bekkem densawlıq, mashaqatlı miynetińizde bárháma tabıslar tileymiz.

Amanbay Orınbaev

Qaraqalpaqstan Respublikası Joqarǵı Keńesiniń Baslıǵı