«Besqala Mining Valley» arnawlı mayning zonasınıń rezidentleri jumısın ámelge asırıw tártibi belgilendi

Ózbekstan Respublikası perspektivalı joybarlar milliy agentligi tárepinen húrmetli Prezidentimizdiń 2026-jıl 17-apreldegi "Qaraqalpaqstan Respublikasında arnawlı mayning zonasın shólkemlestiriw hám onıń jumısın jolǵa qoyıw ilajları haqqında"ǵı 143-sanlı qararınıń orınlanıwın támiyinlew maqsetinde «Besqala Mining Valley» arnawlı mayning zonasınıń rezidentlerin dizimnen ótkeriw hám jumısın ámelge asırıw tártibi haqqındaǵı reje qabıl etildi.

Reje «Besqala Mining Valley» arnawlı mayning zonasınıń jumısın ámelge asırıw, yuridikalıq táreplerdi arnawlı zona rezidentleri sıpatında dizimnen ótkeriw hám olardıń jumısın ámelge asırıw tártibin belgileydi.

Atap aytqanda, Reje menen tómendegiler názerde tutılǵan:

rezident sıpatında dizimge alıw hám de mayningti ámelge asırıw ushın talaplar hám shártler;

rezident sıpatında dizimge alıw ushın usınılatuǵın hújjetler dizimi;

arzalardı tapsırıw, kórip shıǵıw hám olar boyınsha qarar qabıl etiw tártibi;

ruqsat beriw tártip-qaǵıydaları, sonıń ishinde, rezident sıpatında dizimnen ótkenligi haqqındaǵı gúwalıq hám mayningti ámelge asırıw ushın ruxsatnamanı qayta rásmiylestiriw, olarǵa ózgerisler kirgiziw, ámel etiw múddetin sozıw, sonday-aq, olardıń ámel etiwin toqtatıp turıw, toqtatıw hám biykar etiw;

rezidentler tárepinen ruxsat beriw xarakterine ie talaplar hám shártlerge ámel etiliwin qadaǵalaw ilajları;

tabılǵan kripto-aktivlerdi realizaciyalaw tártibi.

Arnawlı zona rezidentlerine mayningti ámelge asırıw ushın qayta tikleniwshi energiya dárekleriniń barlıq túrleri, vodorod elektr stanciyası tárepinen islep shıǵarılǵan, sonday-aq, arnawlı zona aymaǵında jaylasqan rentabelligi tómen, az debitli, tawsılıp baratırǵan kánlerdi, sonday-aq, uglevodorodlardı jetkerip beriwdiń transport sisteması joq yamasa eskirgen kánlerdi keleshekte ózlestiriw, saqlaw hám úskenelew arqalı islep shıǵarılǵan elektr energiyasınan paydalanıwǵa ruxsat beriledi.

Usı Rejeniń qabıl etiliwi jańa jumıs orınların jaratıw arqalı Qaraqalpaqstan Respublikasınıń investiciyalıq tartımlılıǵın arttırıw hám xalıqtıń dáramatların kóbeytiwge, sonday-aq, qayta tikleniwshi energiya dárekleriniń barlıq túrlerinen paydalanǵan halda mayning jumısın ámelge asırıw ushın qolaylı sharayatlar jaratıwǵa qaratılǵan.