Xosh xabar!

Qaraqalpaq mámleketlik universitetiniń bilimlendiriw baǵdarlaması xalıqaralıq akkreditaciyadan ótti

Berdaq atındaǵı Qaraqalpaq mámleketlik universitetiniń 10 bakalavriat tálim baǵdarı hám 10 magistratura qánigeligi Germaniyanıń «ACQUIN» xalıqaralıq akkreditaciya hám sapanı támiyinlew agentligi tárepinen xalıqaralıq akkreditaciyadan ótti.

Bul xalıqaralıq akkreditaciya universitettiń bilimlendiriw baǵdarlamalarınıń Evropa hám xalıqaralıq sapa standartlarına muwapıqlıǵın tastıyıqlaydı hám joqarı oqıw ornınıń xalıqaralıq maydandaǵı abırayı hám básekige shıdamlılıǵın jáne de arttıradı.

Bul óz gezeginde universitet ushın keń imkaniyatlardı jaratadı. YAǵnıy sırt el professor-oqıtıwshıları hám ilimpazların bilimlendiriw hám ilimiy jumısqa keńirek tartıw, sırt elli studentler sanın arttırıw, studentler hám professor-oqıtıwshılardıń Evropa hám basqa da mámleketlerdiń abıraylı joqarı bilimlendiriw mákemeleri menen akademiyalıq almasıw baǵdarlamalarında belsene qatnasıwına tiykar jaratadı.

Sonday-aq, xalıqaralıq grantlar, ilimiy-izertlew joybarları hám sırt el investiciyaların tartıwda universitettiń isenimliligi hám potencialın arttırıw, pitkeriwshilerdiń diplomları hám bilimlendiriw nátiyjeleriniń xalıqaralıq kólemde tán alınıwı hám olardıń sırt elde bilimlendiriwdi dawam ettiriw yamasa miynet jolın jolǵa qoyıw imkaniyatların keńeytedi.

Sonıń menen birge universitettiń xalıqaralıq reytinglerdegi ornın bekkemlew hám jańa strategiyalıq birge islesiw baylanısların rawajlandırıradı. Bul jetiskenlik universitet jámáátiniń bilimlendiriwdiń sapasın xalıqaralıq talaplarǵa sáykes túrde jetilistiriw baǵdarındaǵı izbe-iz miyneti hám nátiyjeli jumısınıń tán alınıwı bolıp tabıladı.