Qaraqalpaqstanǵa jańa transformator punktleri alıp kelindi

Búgingi kúnde respublikamızda tómen kúshleniwli elektr tarmaqların modernizaciyalaw hám rekonstrukciyalaw boyınsha keń kólemli jumıslar ámelge asırılmaqta.

Sonı ayrıqsha aytıw kerek, usı jılı arnawlı baǵdarlamalar sheńberinde Qaraqalpaqstanda jámi 818,4 km 0,4-10 kV elektr uzatıw tarmaqları, 219 dana transformator punktleri, 7 dana yacheyka jáne 8 dana bólistiriw punktlerin (RP) rekonstrukciya hám modernizaciyalaw jumısların alıp barıw rejelestirilgen. Sonnan, búgingi kúnge shekem ámelde 212,8 km elektr uzatıw tarmaqları hám 23 dana transformator punktleri ornatılıp, qurılıs-montajlaw jumısları dawam ettirilmekte.

Ámelge asırılıp atırǵan jumıslar qatarında mámleketimiz basshısınıń arnawlı tapsırmasına tiykar 459-sanlı Prezident qararı hám Ministrler Kabinetiniń 53-sanlı qararınıń orınlanıwın támiyinlew maqsetinde 2025-2029-jıllar aralıǵında Qaraqalpaqstan Respublikası hám Surxandárya wálayatında Jáhán bankiniń 50 million AQSh dolları muǵdarındaǵı qarjıları esabınan tómen kúshleniwli 0,4-110 kV tarmaqlardı modernizaciyalaw hám rekonstrukciyalaw názerde tutılǵan.

Usı joybar sheńberinde 2026-jılı 102,2 mlrd. sumǵa jaqın qarjı esabınan Qaraqalpaqstanda 462,5 km elektr uzatıw tarmaqları, 8 dana bólistiriw punktleri (RP), 6 dana yacheyka hám 118 dana transformator jańadan ornatılıwı belgilengen. Búgingi kúnde obektlerdiń joybar-smeta jumısları juwmaqlanıp, qurılıs-montajlaw jumısların baslaw ushın zárúr materiallar toplanbaqta.

Búgin usı joybardaǵı jumıslar sheńberinde 8 dana transformator punktleri Qaraqalpaqstanǵa alıp kelindi. Jáne 110 dana transformator alıp kelinedi.