Qaraqalpaqstan delegaciyası II Xalıqaralıq Ózbekstan-Koreya energetika forumı sheńberinde áhmietli kelisimlerge qol qoydı

Tashkent qalasında Ózbekstan Respublikası Energetika ministrligi hám Qubla Koreyanıń jetekshi energetika strukturaları menen birgelikte shólkemlestirilgen II Xalıqaralıq Ózbekstan-Koreya energetika forumı (Energy Value Networks Forum) juwmaqlandı.

Onda Qaraqalpaqstan Respublikası Joqarǵı Keńesiniń komitet baslıǵı I.Niyazov basshılıǵındaǵı Qaraqalpaqstan delegaciyası da qatnastı.

Eki kúnlik abıraylı ilaj sheńberinde Qaraqalpaqstan Respublikası delegaciyası tárepinen aymaqta jasıl ekonomika hám joqarı texnologiyalardı engiziwge qaratılǵan sonday-aq, aymaqtı jasıl energetika hám innovaciyalar orayına aylandırıw boyınsha áhmietli kelisimlerge erisildi.

Qubla Koreyanıń aldınǵı kompaniyaları hám institutları menen dúzilgen bul kelisimler Qaraqalpaqstannıń sociallıq infrastrukturasın modernizaciyalaw hám ekologiyalıq turaqlılıqtı támiyinlewde jańa basqıshtı baslap beredi.

Atap aytqanda, Koreya klimat ózgeriwi institutı menen erisilgen kelisim sheńberinde sociallıq obektlerdi quyash panelleri menen támiyinlew, "ForEMDX" shólkemi menen energetika sistemasına jasalma intellekt texnologiyaların engiziw hám aqıllı basqarıw sistemaların (Smart Grid) jolǵa qoyıw, "GoodBeCar" shólkemi menen Qaraqalpaqstanda elektromobiller (EV) batareyaların qáwipsiz utilizaciyalaw, olardı ekilemshi energiya saqlaw sistemaları (ESS) sıpatında qayta islew infrastrukturasın jaratıw názerde tutılmaqta.