Joqarǵı Keńes Baslıǵı Shomanay rayonında jaslar menen ushırastı

Húrmetli Prezidentimiz baslaması menen jaslardı qollap-quwatlaw hám olardıń baslamaların xoshametlew maqsetinde belgilengen piyshembi - Jaslar kúni sheńberinde jaslar menen ushırasıwlar ótkerilip kelinbekte. Bul ushırasıwlar jaslardıń pikir hám ideyaların tıńlaw, olardıń dóretiwshilik hám sociallıq joybarların qollap-quwatlaw sonday-aq, olardıń turmıslıq hám kásiplik potencialın rawajlandırıwǵa qaratılǵan.

Mine usı iygilikli baslama sheńberinde Qaraqalpaqstan Respublikası Joqarǵı Keńesiniń Baslıǵı Amanbay Orınbaev Shomanay rayonındaǵı bir qatar jumıssız hám atalıqqa alınǵan hám belsendi jaslar menen ushırasıw ótkerdi.

Ushırasıwdan aldın, jaslar ushın bos jumıs orınları miynet yarmarkası shólkemlestirildi. Bunnan tısqarı, jaslardın baslamaların qollap-quwatlaw baǵdarında jaratılǵan sharayatlar, berilgen imkaniyatlar boyınsha prezentaciya jıynalǵanlar názerine usınıldı.

Ushırasıwda Joqarǵı Keńes Baslıǵı mámleketimizde húrmetli Prezidentimiz tárepinen Qaraqalpaqstanlı jaslarǵa qaratılıp atırǵan joqarı itibar, olardıń bilim alıwı, kásip-óner ielewi hám óz potencialın kórsetiwi ushın jaratılıp atırǵan imkaniyatlar haqqında ayrıqsha sóz etti. Sonıń menen birge, usınday imkaniyatlardan orınlı paydalanıp, joqarı nátiyjelerge erisip atırǵan jaslar sanı artıp atırǵanı ayrıqsha qanaatlanıwshılıq penen tilge alındı.

Ushırasıw dawamında jaslar da belsene qatnasıp, ózlerin qızıqtırǵan máseleler, mashqala hám usınısların ashıq hám erkin túrde bildirdi. Onda jumıs penen támiyinlew, isbilermenlik jumısın jolǵa qoyıw, jeńilletilgen kreditler alıw, kásip-óner úyreniw hám bilimlendiriw tarawına tiyisli máseleler kóterildi.

Hár bir kóterilgen másele Joqarǵı Keńes Baslıǵınıń jeke qadaǵalawına alınıp, taraw juwapkerlerine tez arada unamlı sheshim tabıw boyınsha anıq tapsırmalar berildi.