Qaraqalpaqstanda derlik 62 kilometr jergilikli áhmiettegi avtomobil jolları cement-beton qaplamalı jollarǵa aylandırıladı

Húrmetli Prezidentimizdiń "Aziya rawajlanıw banki qatnasıwında "Cement-beton qaplamalı ishki jollardı qurıw" joybarın ámelge asırıw ilajları haqqında"ǵı 2024-jıl 15-apreldegi 157-sanlı qararına tiykar, Qaraqalpaqstan Respublikasında awıllıq avtomobil jolların tiklew hámde nátiyjelilikke tiykarlanǵan texnikalıq xızmet kórsetiw boyınsha qurılıs jumısları ámelge asırıladı.

Joybardı ámelge asırıw ushın tiyisli qarjılar ajıratılıp, búgingi kúnde 4 lot boyınsha tender sawdaları járiyalandı.

Atap ótiw orınlı, ulıwma bahası 18,5 million AQSh dollar qarjılar esabınan respublikadaǵı 61,3 km jergilikli áhmiettegi avtomobil jolların cement-beton qaplamalı jollarǵa aylandırıw názerde tutılǵan.

Sonnan, 1-lot boyınsha Taxtakópir, Qaraózek hám Shımbay rayonlarındaǵı jámi 6 obektte 16,6 km, 2-lot boyınsha Kegeyli, Bozataw rayonları hám Nókis qalasındaǵı jámi 7 obektte 18,2 km, 3-lot boyınsha Qońırat, Shomanay hám Qanlıkól rayonlarındaǵı jámi 6 obektte 14,1 km, 4-lot boyınsha Ámiwdárya, Beruniy hám Tórtkúl rayonlarındaǵı jámi 8 obektte 12,4 km jergilikli áhmiettegi avtomobil jolları cement-beton qaplamalı jollarǵa aylandırıladı.

Bul joybar ámelge asırılıwı nátiyjesinde xalıq hám transport quralları ushın ele de qolaylı hám qáwipsiz háreket etiw sharayatları jaratılıp, jergilikli áhmiettegi avtomobil jollarınıń transport-ekspluataciyalıq jaǵdayı jáne de jaqsılanadı.