Jılına yarım tonnadan aslam altın islep shıǵarıw zavodı jumıs basladı

Húrmetli Prezidentimizdiń Qaraqalpaqstanǵa bolǵan ayrıqsha itibarı nátiyjesinde regionımızdıń investiciyalıq tartımlıǵın arttırıw hám isbilermenler ushın imkaniyatlar jaratıw baǵdarında keń kólemli ilajlar dawam ettirilmekte.

Mine usınday jaratılǵan imkaniyatlar nátiyjesinde elimizde birinshi márte isbilermenler tárepinen zamanagóy texnologiyalar usılında altın islep shıǵarıw zavodı iske túsirildi.

Jańa zavodtıń ashılıw saltanatında Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, elimiz ekonomikasın rawajlandırıwda salmaqlı úles qosatuǵın jańa quwatlıq iske túsiriliwi múnásibeti menen jıynalǵanlardı qutlıqladı.

Atap ótiw orınlı, Qıtay mámleketiniń «Dji An Tai international» kompaniyası tárepinen ulıwma 33 million dollar qarjılar esabınan iske túsirilgen jańa zavodta sap altın islep shıǵarıw processi tórt 9 probaǵa (Au 999,9) jetkerilgeni tariyxıy waqıyalardan biri boldı desek asıra aytqan bolmaymız.

Bul obekt tolıq quwatlıqta iske túskennen soń sutkasına 1000 tonna rudanı qayta islew arqalı jılına yarım tonnadan aslam altın islep shıǵarıw jolǵa qoyıladı hám 250 jańa jumıs ornı jaratıladı.

Álbette, búgingi iske túsip atırǵan jańa quwatlıq xalqımızdıń abadan turmısın támiyinlewge xızmet etiwi menen birge, elimiz ekonomikasın jáne de bekkemlewde ayrıqsha orın ieleydi.