Qaraqalpaqstanda isbilermenler ushın jańa imkaniyat, endi hár bir joybar bankler menen birge kórip shıǵıladı

Qaraqalpaqstan Respublikasında «Áhmietli 40 kúnlik» sheńberinde isbilermenlikti qollap-quwatlaw hám xalıqtıń bántligin támiyinlewge qaratılǵan jańa mexanizm iske túsirildi.

Endi perspektivalı biznes ideyalar Joybar ofisi arqalı 9 kommerciyalıq bank hám tiyisli shólkemler menen birgelikte kórip shıǵıladı.

☑️Eń áhmietlisi, joybarlar tek ǵana kredit ajıratıw kózqarasınan emes, al olardı tolıq ámelge asırıw imkaniyatı boyınsha da bahalanadı. Yаǵnıy, finanslıq model, infrastruktura, zárúr ruxsatnamalar hám joybardı ámelge asırıwǵa tosqınlıq etip atırǵan basqa da faktorlar da birgelikte úyrenilip, olardıń sheshimleri islep shıǵıladı.

☑️Bul processte kommerciyalıq bankler de belsene qatnasadı. Olar perspektivalı joybarlardı qarjılandırıw, isbilermenlerge bank xızmetlerin kórsetiw hám biznes baslamaların ámelge asırıwda ámeliy járdem beredi.

☑️Jańa sistemanıń tiykarǵı maqseti - jaqsı biznes ideyalar qaǵazda qalıp ketpewi, olardı tezirek ámelge asırıw, jańa jumıs orınların jaratıw hám xalıqtıń dáramatların arttırıwdan ibarat. Sol arqalı mámleketlik shólkemler hám bankler birgelikte hár bir joybardı nátiyjege shekem alıp barıwǵa háreket etedi.