Nókis qalasında oraylasqan ıssılıq támiynatı sistemasın rawajlandırıw boyınsha oǵada áhmietli qarar qabıl etildi

«Nókis qalasındaǵı "RK-1" qazanxanasın kogeneraciya texnologiyaları tiykarında modernizaciyalaw» joybarın mámleketlik-jeke sheriklik tiykarında ámelge asırıw ilajları haqqında"ǵı 2026-jıl 29-iyul kúngi Prezident qararı qabıl etildi.

Xalıqtı hám ekonomika tarmaqların energiya resursları menen turaqlı támiyinlew, elektr energiyası hám ıssı suwdı islep shıǵarıwda tábiyǵıy gazden paydalanıw kólemin azaytıw, sonday-aq, ıssılıq támiynatı sistemasın rawajlandırıwǵa tikkeley sırt el investiciyaların jedel tartıw maqsetinde tómendegiler belgilendi.

Nókis qalasında oraylasqan ıssılıq támiynatı sistemasın zamanagóy energiya únemlewshi kogeneraciya texnologiyaları tiykarında modernizaciyalaw arqalı xalıq hám ekonomika tarmaqları turaqlı elektr hám ıssılıq energiyası menen támiyinlenedi.

Joybardı ámelge asırıw sheńberinde infrastrukturanı qurıw maqsetinde 28 km ıssılıq tarmaqların qurıw hám 189 ıssılıq punktlerin ornatıw menen jabıq sistemaǵa ótkeriw arqalı 10 320 xalıq elektr, 22 880 xalıq ıssılıq energiyası menen támiyinlenedi.

Elektr energiyası hám ıssı suw islep shıǵarıwda tábiyǵıy gazdiń jumsalıwı optimallastırıladı, ıssılıq tarmaqlarındaǵı shıǵınlar 30 procentke shekem azaytıladı hám energiya nátiyjeliligi 10 procentke arttırıladı.

Íssılıq támiynatı tarawında mámleketlik-jeke sheriklik mexanizmleri engiziledi hám bul baǵdarǵa sırt el investiciyaları tartıladı.

Sonday-aq, qarar menen:

Saudiya Arabstanınıń "Saudi Tabreed District Cooling" kompaniyası tárepinen 20,3 million AQSh dolları muǵdarında sırt el investiciya qarjıları tartıladı;

"Íssılıq támiynatı" AJ mámleketlik sherigi hám Investor tárepinen juwapkershiligi sheklengen jámiet túrinde shólkemlestiriletuǵın arnawlı joybarlaw kompaniyası jeke menshik sherik etip belgilenedi.