Joqarǵı Keńes Baslıǵı Tórtkúl rayonında gúz-qıs máwsimine tayarlıq hám kommunal tarawdaǵı jumıslar menen tanıstı

Qaraqalpaqstan Respublikası Joqarǵı Keńesiniń Baslıǵı Amanbay Orınbaev Tórtkúl rayonında bolıp, xalıqtı sapalı hám turaqlı kommunallıq xızmetler menen támiyinlew baǵdarındaǵı jumıslardı úyrendi.

Dáslep "Ǵalaba" máhállesindegi transformator punktiniń jumısı kózden ótkerildi. Elektr tarmaqlarındaǵı joǵaltıwlardı azaytıw hám úzliksiz uzatıwdı támiyinlew boyınsha ámelge asırılıp atırǵan ilajlar kórip shıǵılıp, anıqlanǵan kemshiliklerdi jedellik penen saplastırıw boyınsha juwapkerlerge tapsırmalar berildi.

Sonday-aq, Joqarǵı Keńes Baslıǵı "Ullıbaǵ" APJdaǵı gaz bólistiriw qurılmalarınıń islew jaǵdayı hám energiyanı únemlewshiligin kózden ótkerdi. "Ibn Sino" máhállesiniń Tórtkúl kóshesinde alıp barılıp atırǵan gaz tarmaǵın rekonstrukciyalaw processin barıp kórdi.

Mánzilli úyreniwler dawamında gaz qubırların tártipke keltiriw, boyaw hám gaz shıǵıwınıń aldın alıw arqalı qáwipsizlikti támiyinlew boyınsha anıq kórsetpeler belgilendi.

Bunnan keyin Joqarǵı Keńes Baslıǵı nuraniylar hám máhálle belsendileri menen ushırasıp, aymaqtı sociallıq-ekonomikalıq rawajlandırıw hám xalıqtıń abadanlıǵın arttırıwǵa qaratılǵan keń kólemli reformalar boyınsha pikirlesti.