Qaraqalpaqstanǵa Qıtaydan 50 mıń bas násilli qaramal alıp kelinedi

Húrmetli Prezidentimizdiń 179-sanlı qararı menen sharwashılıqtı rawajlandırıw baǵdarında belgilengen tapsırmalardıń orınlanıwın támiyinlew maqsetinde Ministrler Keńesi Baslıǵınıń birinshi orınbasarı F.Nurmuxammadov basshılıǵındaǵı Qaraqalpaqstan delegaciyası Qıtay mámleketine bardı.

Sapar sheńberinde Qıtaydıń “Hualing Yecheng Agriculture and Animal Husbandry Development Co., Ltd.” JShJ hám “Wrta qala chorva mollari” JShJ arasında birge islesiw memorandumına qol qoyıldı.

Kelisim boyınsha úsh jıl dawamında Qaraqalpaqstanǵa 50 mıń bas násilli qaramal alıp keliniwi belgilengen. Joybardıń dáslepki basqıshında 200 bas násilli mal alıp kelinip, olardı kútimli baǵıw hám kóbeytiw jumısları jolǵa qoyıldı.

Atap ótiw orınlı, bul joybar sharwashılıqtıń násilshilik bazasın bekkemlew, joqarı ónimdarlı qaramallar sanın kóbeytiw, gósh hám sút islep shıǵarıw kólemin arttırıw, sonday-aq, tarawda zamanagóy texnologiyalar hám aldınǵı tájiriybelerdi keńnen engiziwge xızmet etedi.

Bunday xalıqaralıq birge islesiw joybarları aymaqlarda sharwashılıqtı turaqlı rawajlandırıw, xalıqtıń bántligin támiyinlew hám azıq-awqat qáwipsizligin bekkemlewde úlken áhmietke ie bolmaqta.