Bir topar belsendi isbilermenler sıylıqlandı

Qaraqalpaqstan Respublikası Joqarǵı Keńesinde Isbilermenler kúni múnásibeti menen bir topar baslamashı isbilermenlerdi sıylıqlaw máresimi bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimiz tárepinen isbilermenlikti rawajlandırıw baǵdarında qaratılıp atırǵan itibar hám bul baǵdarda qabıl etilip atırǵan párman hám qararlar haqqında keń túrde atap ótti.

Ilajda aytıp ótilgenindey, sońǵı jılları Qaraqalpaqstan ushın óz aldına qabıl etilgen qarar hám pármanlar regionda isbilermenlikti rawajlandırıw, investiciyalıq tartımlılıqtı arttırıw hám ekonomikalıq ósimdi támiyinlewde bekkem tiykar bolıp xızmet etpekte. Qısqa waqıt ishinde jańadan-jańa obekter iske túsirilip, iri kólemdegi investiciyalıq joybarlar ámelge asırılmaqta.

Ótkerilgen ilajda mine usınday iygilikli jumıslar keń túrde atap ótildi.

Bayram ilajında húrmetli Prezidentimizdiń arnawlı Pármanları tiykarında sıylıqlanǵan isbilermenlerimizge «Shuhrat» medalı hám «Faol tadbirkor» kókirek belgisi saltanatlı túrde tapsırıldı.

Bunnan tısqarı, Joqarǵı Keńes Prezidiumı qararı menen bir qatar isbilermenler Joqarǵı Keńestiń kókirek belgileri hám bahalı sawǵalar menen sıylıqlandı.