Jańa studentler turaq jayı - jaslar ushın jaratılıp atırǵan imkaniyatlardıń jáne bir kórinisi

Búgin Berdaq atındaǵı Qaraqalpaq mámleketlik universitetinde Ózbekstan Respublikası Ǵárezsizliginiń 35 jıllıǵı aldınan jańa, zamanagóy tiptegi studentler turaq jayınıń paydalanıwǵa tapsırılıwına baǵıshlanǵan saltanatlı ilaj bolıp ótti.

Onda universitet professor-oqıtıwshıları, xızmetkerler, ǵalaba xabar qurallarınıń wákilleri hám keń jámietshilik wákilleri qatnastı.

Ilajda atap ótilgenindey, sońǵı jılları Prezidentimizdiń basshılıǵında barlıq tarawlar qatarında bilimlendiriw sistemasın rawajlandırıw, jaslardıń zamanagóy bilim hám kásip-óner ielewi ushın múnásip sharayatlar jaratıwǵa ayrıqsha itibar qaratılmaqta.

Berdaq atındaǵı Qaraqalpaq mámleketlik universitetinde paydalanıwǵa tapsırılǵan jańa studentler turaq jayı da mine usınday iygilikli hám dóretiwshilik jumıslardıń ámeliy kórinisi bolıp tabıladı. Zamanagóy arxitektura hám qurılıs standartları tiykarında qurılǵan bul kompleks jámi 500 studentti jaylastırıw imkaniyatına iye.

Turaq jayda studentlerdiń qolaylı hám qáwipsiz jasawı, bilim alıwı hám bos waqıtların mazmunlı ótkeriwi ushın barlıq zárúr sharayatlar jaratılǵan. Xanalar, turmıslıq hám sanitariyalıq sharayatlar menen bir qatarda, jaslardıń dem alıwı, erkin shuǵıllanıwı hám bos waqtın nátiyjeli shólkemlestiriwge xızmet etetuǵın qolaylıqlar da názerde tutılǵan.

Ilaj sońında qatnasıwshılar jańadan qurılǵan studentler turaq jayın kózden ótkerip, onda jaratılǵan sharayatlar menen jaqınnan tanıstı.