Mámleketimiz Ǵárezsizligi bayramı múnásibeti menen «Ózbekstan Respublikası Ǵárezsizliginiń 35 jıllıǵı» estelik belgisi tapsırıldı

Mámleketimizdiń ekonomikalıq qúdiretin arttırıw, isbilermenlik hám jeke menshik sektordı rawajlandırıw, jańa jumıs orınların jaratıw, xalıqtıń abadanlıǵın, mámleketlik hám jámietlik turmıstıń barlıq tarawlarında reformalardıń nátiyjesin támiyinlewde jankúerlik kórsetip kiyatırǵan, jas áwladtı watansúyiwshilik ruwxında tárbiyalaw, elimizde tınıshlıq-tatıwlıq, milletleraralıq tatıwlıq hám keńpeyillik ortalıǵın bekkemlew, Jańa Ózbekstannıń xalıqaralıq kólemdegi abıray-mártebesin arttırıwǵa múnásip úles qosıp atırǵan watanlaslarımızdı sıylıqlaw maqsetinde jaqında Ózbekstan Respublikası Prezidentiniń «Ózbekstan Respublikası ǵárezsizliginiń 35 jıllıǵı» estelik belgisi menen sıylıqlaw haqqında»ǵı Pármanı qabıl etilgen edi.

Párman menen Qaraqalpaqstan Respublikasınan da bir topar belsendiler sıylıqlandı.

Qaraqalpaqstan Respublikası Joqarǵı Keńesinde usı sıylıqlardı tapsırıwǵa arnalǵan ilaj ótkerildi. Onda Joqarǵı Keńes Baslıǵı Amanbay Orınbaev shıǵıp sóylep, eń ullı hám eń áziz bayram múnásibeti menen jıynalǵanlardı qutlıqladı.

Bunnan soń elimiz rawajlanıwı jollında múnásip úles qosıp atırǵan bir topar belsendilerge «Ózbekstan Respublikası Ǵárezsizliginiń 35 jıllıǵı» estelik belgisi tapsırıldı.

Ilajda sózge shıqqanlar xalqımızdıń abadan turmısın támiyinlew jolında bunnan-bılayda ayanbay xızmet etetuǵınlıǵın atap ótip, miynetleri múnásip bahalanıp atırǵanı ushın húrmetli Prezidentimizge ayrıqsha minnetdarshılıǵın bildirdi.