Qaraqalpaqstanda iske túsirilgen iri obektler barıp kórildi

Keshe húrmetli Prezidentimiz Shavkat Mirziyoevtiń qatnasıwında mámleketimiz ǵárezsizliginiń 35 jıllıǵı múnásibeti menen aymaqlarda ulıwma bahası 50 trillion sumlıq 163 jańa obektti iske qosıw máresimi bolıp ótken edi. Onda mámleketimiz basshısı rámziy túymeni basıp, jańa iri obektler, sonıń ishinde Qaraqalpaqstanda 12 iri obekt paydalanıwǵa tapsırıldı.

Bugin bir topar mámleketlik belsendiler, nuranıylar hám keń jámietshilik wákilleri usı obektler menen jaqınnan tanıstı.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev elimizde iske túsirilip atırǵan bunday iri obektler húrmetli Prezidentimizdiń basshılıǵında ámelge asırılıp atırǵan reformalardıń hám Qaraqalpaqstan ushın ayrıqsha qaratılǵan itibardıń nátiyjesi ekenligin atap ótti.

Dáslep, Nókis qalasındaǵı jańadan ashılǵan avtoklav usılında gazoblok islep shıǵarıw kárxanası jumısları barıp kórildi.

Atap ótiw orınlı, 175 mlrd. sum qarjı esabınan jańadan qurıp pitkerilgen kárxanada jılına 350 mıń kub metr gazoblok islep shıǵarıw quwatlıǵı jaratılǵan. Eń tiykarǵısı, bul kárxana tolıq quwatlıqta iske túsiwi menen 90 puqaranıń bántligi támiyinlenedi.

Miymanlar kárxana jumıs processi menen tanısıp, jumısshılar menen jaqınnan pikirlesti.