Sonday-aq, jámietshilik belsendileri 153 mlrd. sum qarjı esabınan shólkemlestirilgen Qaraqalpaqstan ilimiy-ámeliy medicina akademiyasınıń jumısı menen jaqınnan tanıstı

Sonı ayrıqsha aytıw kerek, húrmetli Prezidentimiz Qaraqalpaqstanǵa bolǵan saparı dawamında Respublika qıstawlı medicinalıq járdem ilimiy orayı Qaraqalpaqstan filialı jumısı menen jaqınnan tanısıp, Qaraqalpaqstanda medicina tarawı xızmetkerleriniń tájiriybesin arttırıw ushın sharayat jaratıw boyınsha tapsırma bergen edi. Mine usı tiykarda ilimiy-ámeliy akademiya shólkemlestirilip, paydalanıwǵa tapsırıldı.

Akademiyada 159 jańa jumıs ornı shólkemlestirilgen bolıp, bul jerde medicina xızmetkerleriniń kásiplik mamanlıǵın arttırıw hám zamanagóy medicinalıq ámeliyattı ózlestiriwi ushın barlıq zárúr sharayatlar jaratılǵan. Atap aytqanda, akademiya eń zamanagóy medicinalıq úskeneler, arnawlı texnikalıq qurallar hám simulyaciyalıq xanalar menen támiyinlengen.

Itibarlı tárepi, bul jerde ornatılǵan ayırım zamanagóy úskeneler tek ǵana mámleketimizde emes, al Oraylıq Aziyanıń basqa da mámleketlerinde de sanawlı esaplanadı. Bul bolsa medicina qánigeleriniń teoriyalıq bilimi menen bir qatarda, ámeliy kónlikpelerin de joqarı dárejede qáliplestiriw imkaniyatın beredi. Bul óz gezeginde, xalıqqa kórsetilip atırǵan medicinalıq xızmetlerdiń sapası hám nátiyjeliligin bunnan bılay da arttırıwda áhmietli qádem bolıp esaplanadı.