Qońırat rayonında jańa kóp qabatlı turaq jay paydalanıwǵa tapsırıldı

Qońırat rayonı orayındaǵı «Azatlıq» máhállesinde zamanagóy kóp qabatlı turaq jay imaratınıń ashılıw máresimi bolıp ótti.

Ilaj mámleketimiz ǵárezsizliginiń 35 jıllıǵı múnásibeti menen elimizde ámelge asırılıp atırǵan keń kólemli dóretiwshilik jumısları sheńberinde shólkemlestirildi.

Atap ótiw orınlı, húrmetli Prezidentimizdiń 2025-jıl 1-apreldegi 132-sanlı qararı menen Qońırat rayonın 2025-2026-jıllarda jedel kompleksli rawajlandırıw baǵdarlaması tastıyıqlanǵan. Qararda rayon orayında xalıqtıń jasawı hám isbilermenlik jumısı ushın qolaylı sharayat jaratıw, sonday-aq, 2026-jıldan baslap eski turaq jaylardıń ornında renovaciya tiykarında zamanagóy kóp qabatlı turaq jaylardı qurıw wazıypaları belgilengen edi.

Bul wazıypalardıń ámeliy kórinisi sıpatında «Azatlıq» máhállesinde burın bolǵan eski hám avariyalıq jaǵdaydaǵı eki qabatlı turaq jaylardıń ornında 5 qabatlı, 35 kvartiraǵa mólsherlengen zamanagóy turaq jay imaratı boy tikledi.

Jańa imarat zamanagóy arxitekturalıq talaplarǵa juwap beriwi menen birge, aymaqtıń kórinisin jańalaw hám xalıq ushın qolaylı jasaw sharayatların jaratıwǵa xızmet etpekte.

Ashılıw máresiminde jańa kvartira ielerine jańa úy giltleri tapsırıldı.