Qońırat rayonında Jańa Ózbekstan kóshesi paydalanıwǵa tapsırıldı

Búgingi kúnde elimizde júz berip atırǵan túpkilikli ózgerisler hám keń kólemli dóretiwshilik isleri ǵárezsizligimiz jaratıp bergen imkaniyatlar, insan qádiri ushın degen iygilikli ideya tiykarında ámelge asırılıp atırǵan reformalardıń ámeliy nátiyjesi esaplanadı.

Mine usınday ullı dóretiwshilik jumıslar ámelge asırılıp atırǵan aymaqlardıń biri, Qońırat rayonında ǵárezsizlik bayramı qarsańında «Jańa Ózbekstan» kóshesi paydalanıwǵa tapsırıldı.

Saltanatlı ashılıw máresiminde Qaraqalpaqstan Respublikası Joqarǵı Keńesiniń Baslıǵı Amanbay Orınbaev bayram múnásibeti hám jańalanǵan avtomobil jolı paydalanıwǵa tapsırılıwı menen jıynalǵanlardı qutlıqladı.

Atap ótilgenindey, búgingi kúnde rayon aymaǵında barlıq mámleketlik baǵdarlamalar sheńberinde 208 mlrd. sumlıq qurılıs jumıslar ámelge asırılmaqta.

Ámelge asırılıp atırǵan jumıslar qatarında húrmetli Prezidentimizdiń arnawlı qararı tiykarında 33 mlrd. sumlıq qarjılar esabınan Jańa Ózbekstan kóshesiniń rekonstrkciyalanıp, paydalanıwǵa tapsırılıwı rayon xalqı ushın haqıyqıy bayram sawǵası boldı.

Avtomobil jolı 7 metrden 16 metrge keńeytilip, asfaltobeton qaplaması tóseldi. 4,1 km piyadalar hám velosiped jolları qurıldı. Bólip turıwshı tosıqlar, túngi jaqtılandırıw shıraqları ornatıldı. Piyadalar hám avtomobiller ushın barlıq qolaylıqlar jaratılıp, payızlı orınlardıń birine aylandırıldı.

Álbette, bunday iygilikli isler rayon aymaǵında, pútkil respublikamız boylap bunnan-bılay da dawam ettiriledi.