Joqarǵı Keńes Baslıǵı Amanbay Orınbaevtıń Ózbekstan Respublikası mámleketlik ǵárezsizliginiń otız bes jıllıǵına baǵıshlanǵan saltanatlı máresimdegi shıǵıp sóylegen sózi
Assalawma áleykum, Áziz Watanlaslar!
Eӊ dáslep, Sizlerdi həm Sizler arqalı gúllən xalqımızdı elimiz tariyxındaǵı qutlı sáne, Eӊ ullı hám Eӊ áziz áyyyam – Ǵárezsizligimizdiń 35 jıllıq bayramı menen Qaraqalpaqstan Respublikası Joqarǵı Keӊesi hám Ministrler Keӊesi atınan qızǵın qutlıqlap, elimizdiӊ jáne-de rawajlanıwı hám xalqımızdıń abadan turmısı jolındaǵı barlıq iygilikli isleriӊizde tasqın tabıslar tilewge ruxsat etkeysizler!
Qádirli doslar!
Maqtanısh penen aytıwımız kerek, elimizdiń ѳzine tán rawajlanıwına keń jol ashıp bergen, erkin hám abadan turmısımızdıń tımsalı bolǵan Ǵárezsizlik biziń eń úlken biybaha baylıǵımız, milliy maqtanıshımız hám aydın keleshegimizdiń isenimli kepili bolıp tabıladı.
Sonlıqtan da, bul qutlı sáne xalqımızdı jańadan-jańa tabıslarǵa baslawshı hám ullı dѳretiwshilik islerge ruwxlandırıwshı bayram sıpatında hár jılı pútkil elimiz boylap keń túrde hám úlken quwanısh penen belgilenedi.
Áhmietlisi, bıyılǵı bayram ilajları Húrmetli Prezidentimizdiń arnawlı Qararı tiykarında «Bir Watan, bir xalıq bolıp, jańa turmıs hám keleshek quramız!» degen tereń mazmunlı ideya astında ótkeriliwi kѳp milletli xalqımızdı — ana Watanımızdı jáne de rawajlandırıw jolında birlestirip, bárshemizdi iygilikli islerge ruwxlandırmaqta.
Álbette, otız bes jıl – tariyx ushın qısqa dáwir bolıwı múmkin. Biraq, Jańa Ѳzbekstanımızda jasap atırǵan hár bir insan ushın ѳzligimizdi ańlaw, milliy qádiriyatlarımızdı ulıǵlaw, ásirlerge tatıytuǵın rawajlanıwlar hám jańalanıwlar dáwiri boldı, desek qátelespeymiz.
Haqıyqatında da, sońǵı jılları júz bergen tariyxıy waqıyalarǵa názer taslaytuǵın bolsaq, húrmetli Prezidentimizdiń baslaması hámde Prezident Administraciyası Baslıǵınıń qollap-quwatlawı menen milliy miyraslarımızdıń saylandı úlgileri – Qobız soǵıw, Jırawshılıq óneri hámde Qara úy YUNESKOnıń dizimine alınǵanın, paytaxtımızda boy tiklegen dúnyadaǵı eń úlken Qara úy «Ginnestiń rekordlar kitabı»na kirgizilgenin, usı jerde «Aralboyı – tek ǵana ekologiyalıq aymaq emes, al, úlken mədeniyat orayı» degen ideyanı ѳzinde jámlegen «Aral mádeniyatı sammiti»niń ótkerilgenin kѳp milletli xalqımız úlken quwanısh hám maqtanısh penen kútip aldı.
Álbette, bul húrmetli Prezidentimizdiń bay mádeniy miyraslarımızǵa bolǵan joqarı itibarı hám ǵamxorlıǵınıń ámeliy kѳrinisi bolıp esaplanadı.
Mine, usınday xalqımız turmısında oǵada áhmietli bolǵan úlken jańalıqlar haqqında sѳz etkende, 367 million dollarlıq «Nókis-1» hám «Nѳkis-2» samal elektr stanciyalarınıń iske túsirilgeni, bul orında 300 megavatlıq Samal trubinaları hám 100 megavatlıq elektr energiyasın saqlaw batareyalarınıń ornatılǵanı, sonday-aq, elimizdi Evropa mámleketleri menen baylanıstırıwshı, 323 million dollarlıq «Qońırat-Beynew» avtomobil jolınıń 240 kilometr bóleginiń paydalanıwǵa tapsırılǵanı, «Ámiwdárya» dáryası ústinen ѳtiwshi, 379 milliard sumlıq zamanagѳy kѳpirdiń qurılǵanı, Aral teńiziniń ultanında 2 million gektar maydanda shѳlge shıdamlı ѳsimlikler egilip, «Jasıl qaplamalar» jaratılǵanı, Taxtakѳpirde qurılǵan «Qaratereń» turistlik kompleksi hám milliyligimizdi ѳzinde sáwlelendirgen «Etno awılı» xalqımızdıń payızlı dem alıw orınlarına aylanǵanı, «Nókisten - Moynaq, Almata, Aqtaw jónelislerinde avia-qatnawlardıń, «Nѳkis – Manǵıstaw» jѳnelisinde poezd qatnawınıń jolǵa qoyılǵanı, bulardıń barlıǵı elimizdiń jańa tariyxına altın háripler menen jazılıp atırǵan quwanıshlı waqıyalardan sanaladı.
Áziz Watanlaslar!
Sońǵı jılları barlıq tarawlarda ámelge asırılıp atırǵan reformalar jańadan-jańa tabıslarǵa bekkem tiykar bolmaqta. Bir ǵana ekonomikalıq kѳrsetkishler mısalında aytatuǵın bolsaq, 2016-jılı jalpı aymaqlıq ónim 8 yarım trln. sumdı quraǵan bolsa, usı jıl basında bul kórsetkish 6,3 esege ѳsip, 54 trillion sumnan astı. Bunda, isbilermenlerdiń úlesi 66 procentke jetti.
Sonday-aq, isbilermenlik subektleriniń sanı 26 yarım mıńǵa jetip, 2 yarım esege kóbeygeni, sırt el investiciyaları 500 esege ѳsip, usı jıl basına 2 yarım milliard dollarǵa jetkeni, eksportyor kárxanalar sanı 4 esege kѳbeyip, 250 ge jetkeni hám eksport kѳlemi ortasha esapta 8 esege óskeni, sırt el kapitalı qatnasındaǵı karxanalar sanı 4 esege kѳbeyip, 251 ge jetkeni – bulardıń barlıǵı ekonomikamızdıӊ tez pátler menen rawajlanıp atırǵanın dálilleydi.
Sonday-aq, jańa jumıs orınların jaratıwda áhmietli orın tutatuǵın sanaat ѳnimlerin islep shıǵarıw kѳlemi 2016-jıldaǵı 4 yarım trln. sumnan 29 trln. sumǵa jetkenin de ayrıqsha atap ѳtsek arzıydı.
Usılar menen bir qatarda, sońǵı jılları Húrmetli Prezidentimizdiń basshılıǵında turmısqa engizilip atırǵan reformalar, barlıq orınlarda, hátteki, eń shetki máhállelerde ámelge asırılıp atırǵan dóretiwshilik isler, jaslarımızdı, hayal-qızlarımızdı hám nuranıylarımızdı qollap-quwatlaw baǵdarındaǵı ámeliy jumıslar xalqımızdıń abadan turmısın támiyinlewde oǵada áhmietli orın tutpaqta.
Álbette, bunda ѳtken 10 jıl ishinde húrmetli Prezidentimizdiń tek ǵana Qaraqalpaqstan ushın qabıl etilgen 80 nen aslam Párman hám Qararları aymaqta burın bolmaǵan iygilikli islerge bekkem tiykar bolmaqta.
Atap aytqanda, puqaralarımızdı bir-neshshe jıllardan berli qıynap kiyatırǵan mashqalalar ѳz sheshimin tawıp, nızamsız qurılǵan 39 mıń 138 turaq-jaydıń kadastr hújjetleri islep berildi.
Sonday-aq, járdemge mútáj puqaralardıń 21 mıńnan aslam turaq-jaylarında qurılıs-ońlaw jumıslarınıń ámelge asırılıp atırǵanı, pensiya hám napaqa alıwshılar, mayıplıǵı bolǵan puqaralar temir-jol hám avia biletlerden 2 esege arzanlastırılǵan bahada paydalanıp atırǵanı, bunnan tısqarı, ótken 4 jıldıń ishinde Qaraqalpaqstanlı 37 mıńǵa jaqın jaslardıń qosımsha kvotalar tiykarında student bolıw baxtına miyasar bolǵanı, bıyılǵı jılı da qosımsha kvotalardıń ajıratılıwı názerde tutılıp atırǵanı, bulardıń barlıǵı «Insan qádiri ushın» degen ideyanı ѳzinde jámlegen hám mıń-mıńlaǵan puqaralarımızdıń quwanıshına sebep bolıp atırǵan iygilikli islerden sanaladı.
Qádirli Watanlaslar!
Mine, usınday iygilikli isler qatarında, isbilermenlerge berilgen jeńillikler hám jaratılǵan keń imkaniyatlar nátiyjesinde Qaraqalpaqstanda aldınları bolmaǵan qurılıs materialları, tekstil, farmacevtika, elektrotexnika, terini qayta islew hám azıq-awqat sanaatı sıyaqlı jańa tarmaqlar payda bolıp, kѳplegen zavod, fabrika hám kárxanalar iske tusirildi.
Ayırımların aytıp ѳtetuǵın bolsaq, paytaxtımız Nókis qalasında, 50 million dollarlıq bazalt mineralınan ıssılıq saqlawshı materiallar islep shıǵarıw kárxanasınıń iske tusti, 48 yarım million dollarlıq iyirilgen jip islep shıǵarıw kárxanasınıń jumıs basladı, 23 yarım million dollarlıq jılıtıw radiatorların islep shıǵarıw zavodınıń ashıldı, 15 million dollarlıq gazablok tayarlaw kárxanası iske tusti, Qaraqalpaqstanda 1-márte Amerikanıń abıroylı kompaniyası «Ramada by Wyndham» brendi astında 10 million dollarlıq 5 juldızlı miymanxananıń jumısı jolǵa qoyıldı.
Sonday-aq, shet el investorları menen birge 8 million dollarlıq ayaq kiyim hám teri ónimlerin islep shıǵarıw jolǵa qoyılıp atırǵanı, itibarlısı, bul kárxana Italiyanıń dúnyaǵa belgili “Ferrari” brendindegi avtomobillerge teri ѳnimleri jetkerip berilmekte.
Sonday-aq, Tѳrtkúl rayonında 7 million dollarlıq, jılına 4 yarım mln dana Shiyshe ıdıslarǵa gúl basıw kárxanası iske tústi, «Dúnya Medstroy» jámieti tárepinen 4 million dollarlıq 3 etajlı medicina klinakasınıń shѳlkemlestirildi.
Joqarıdaǵılar menen bir qatarda, elimizde 1-márte qıtaylı investorlar menen birge jılına yarım tonnadan aslam altın islep shıǵarıw jolǵa qoyılǵanı; Beruniyde 300 milliard sumlıq sawda kompleksi shólkemlestirilip, 250 den aslam jumıs orınlarınıń jaratılǵanı, Kegeyli hám Nѳkis rayonlarında 16 million dollarlıq, jılına 280 mıń bas násilli tawıqlardı jetistiriwge mѳlsherlengen qusshılıq fabrikalarınıń ashılǵanı, Shımbay, Qaraózek, Taxtakѳpir, Beruniy hám Ellikqala rayonlarında tayar tekstil ónimlerin islep shıǵarıw boyınsha jańa quwatlıqlardıń jaratılǵanı, Moynaq hám Qońıratta jılına 20 mıń tonna ekstra hámde 3 mıń tonna tabletka kórinisindegi duz islep shıǵarıw jolǵa qoyılǵanı,Qaraózekte 12 million dollarlıq hák islep shıǵarıw kárxanası iske túskeni, Taxtakópirde 10 million dollarlıq sharwashılıq, jún hám sútti qayta islew karxanaları jumıs baslaǵanı, Kegeylide 4 million dollarlıq boyan tamırdıń shıǵındısınan «DVP» ѳnimlerin islep shıǵarıw kárxanası ashılǵanı, «Shımbay un», «Qıpshaq», «Xojeli un», «Qıyat», «Qanlıkól unları» brendleri astında un zavodlarınıń iske túsirilgeni, bulardıń barlıǵı Ǵárezsizligimizdiӊ qanshelli dóretiwshi kúshke ie ekenin jáne bir márte dálillep, isbilermenlerimizdiń usınday qolaylı imkaniyatlardan nátiyjeli paydalanıp atırǵanın kѳrsetedi.
Áziz doslar!
Áhmietlisi, bunday iygilikli isler ele de dawam ettiriledi hám jaqın jıllar ishinde kѳplegen jańa kárxana hám zavodlar iske túsiriledi.
Mısallar menen aytatuǵın bolsaq, bir ǵana jasalma intelekt texnologiyaların rawajlandırıw baǵdarında 5 milliard 110 million dollarlıq 3 Mayning hám DATA orayları qurıladı. Sonıń ishinde Taqıyatasta qıtaylı investorlar qatnasında 3 yarım milliard dollarlıq DATA oraydıń 1-basqıshı jaqın kúnlerde iske túsedi.
Sonday-aq, Qońıratta 3,2 mıń Mega-vattlıq 3 milliard 300 million dollarlıq Gigant samal elektr stanciyaları qurılmaqta, Tebinbulaq káninde jılına 58 million tonna temir rudasın qazıp alıw maqsetinde 2 milliard dollarlıq zavod qurılısı dawam ettirilmekte, paytaxtımızda 78 million dollar qarjı esabınan zamanagóy 5 juldızlı miymanxana, Kongress-xoll hám 22 qabatlı turaq jay qurılmaqta, qalaberse, bahası 40 million dollarlıq Sanaat Texnoparki shólkemlestirilip, bul orında isbilermenler ushın tayar imaratlar qurıp beriledi.
Usılar menen birge Nѳkis qalasında, 120 mln dollarlıq "KIA" avtomobil zavodı ushın 6 túrli detallardı islep shıǵarıw kárxanası jumıs baslaydı, «Doslıq» kanalı boyında «Seul Mun» úlgisinde 100 million dollarlıq dem alıw ornı, sawda orayı shólkemlestiriledi, Ashshıkól boyında 20 million dollarlıq turaq jay kompleksi, zamanagóy miymanxana hám dem alıw ornı boy tikleydi, 82 yarım milliard sum qarjı esabınan Logistika orayı qurıladı, 3 million dollarlıq Dári-dármaq islep shıǵarıw kárxanasınıń jumısı jolǵa qoyıladı.
Sonday-aq, Beruniy rayonında, 3 million dollarlıq jılına 36 mıń tonna sharwa hám balıqshılıq ushın aralas jem islep shıǵarıwshı Agrokompleks jumıs baslaydı, Qıtaylı investorlar menen birge 5 mln dollarlıq Gazoblok islep shıǵarıw kárxanası iske tusiriledi, 10 million dollarlıq miywe-ovoshtı qayta islew quwatlıqları jaratıladı.
Usılar menen bir qatarda, Nѳkis rayonında 15 million dollarlıq mıstan trubka hám kabeller islep shıǵarıw jolǵa qoyıladı, Taxtakópir hám Kegeyli rayonlarında ulıwma bahası 40 million dollarlıq iyirilgen jip islep shıǵarıw fabrikaları ashıladı, Xojelide 35 million dollarlıq Shiyshe ıdıslar islep shıǵarıw kárxanasınıń jumısı qayta tiklenedi, Qońıratta qıtaylı investorlar tárepinen 30 mln dollarlıq samal turbinaların islep shıǵarıw zavodı qurıladı, Ellikqala hám Ámiwdárya rayonlarında 37 yarım mln dollarlıq zamanagóy 2 sawda orayı iske túsiriledi.
Elimiz ekonomikasın bekkemlewde áhmietli orın tutatuǵın bunday joybarlardı hár bir rayon mısalında kѳplep keltiriwimizge boladı.
Húrmetli Watanlaslar!
Álbette, elimizdiń gúllep-rawajlanıwın hám xalqımızdıń abadan turmısın qurılıs-abadanlastırıw jumıslarısız kѳz aldımızǵa keltire almaymız.
Orınlarda alıp barılıp atırǵan keń kѳlemli jumıslar nátiyjesinde sońǵı jılları Qaraqalpaqstan úlken qurılıs maydanına aylanıp barmaqta.
Bir ǵana mısal, 2016-jılı qala hám rayonlarda ulıwma qurılıs jumısları kѳlemi 1 trln. 172 milliard sumdı quraǵan bolsa, usı jıldıń basında bul kórsetkish 8 yarım esege ѳsip, derlik 10 trillion sumǵa jetkenligin ayrıqsha atap ѳtemiz.
Mine, usınday iygilikli islerdiń nátiyjesinde jańadan 435 ke jaqın kѳp qabatlı turaq jaylar qurılıp, 17 mıńnan aslam shańaraqlar jańa turaq jaylarǵa kѳship ѳtken bolsa, 462 mektep, 295 mámleketlik balalar baqshası, 94 densawlıqtı saqlaw, 60 mádeniyat hám sport obektlerinde qurılıs-ońlaw jumısları alıp barılıp, xalqımız, ásirese, jaslarımız ushın qolaylı sharayatlar jaratıldı.
Sonıń menen birge, 4,5 mıń kilometrden aslam ishimlik suw hám kanalizaciya tarmaqları qurılıp, xalıqtıń oraylasqan ishimlik suw menen támiyinleniw dárejesi 51 procentten 77 procentke jetkeriledi.
Sonıń ishinde Nókis suw tazalaw obektinde 87 milliard sumlıq rekonstrukciya jumısları islenip, paytaxtımız xalqı tolıq taza ishimlik suwı menen támiyinlengen bolsa, Nókis rayonında 11 yarım million dollarlıq 263 km ishimlik suw tarmaqları tartılıp, taza ishimlik suwı menen támiyinleniwi 68 procentten – 90 procentke jetkerildi.
Qalaberse, ѳtken jıllarda 700 ge jaqın transformator hám 2400 kilometrden aslam elektr liniyaların jańalaw esabınan 200 mıńǵa jaqın shańaraqlarda elektr energiyasınıń tiykarsız úzilisleri kemeyiwine erisildi.
Sonday-aq, 5 trln. sumnan aslam qarjı esabınan 5 mıń 741 kilometr avtomobil jolları asfaltlandı hám 128 kѳpirde qurılıs-ońlaw jumısları alıp barıldı.
Sońǵı jılları qurılǵan sociallıq taraw obektleri haqqında aytatuǵın bolsaq, bayram aldınan paytaxtımızdaǵı «Turan» stadionınıń paydalanıwǵa tapsırılǵanı – jaslarımız ushın haqıyqıy bayram sawǵası boldı.
Itibarlısı, 117 milliard sumlıq qarjı esabınan zamanagѳy kѳriniske keltirilgen bul imaratta 200 orınlı jataqxana, 3 sport zalı, Futbol akademiyası ushın oqıw xanaları bolıp, futbolshılarımız ushın barlıq sharayatlar jaratıldı.
Sonıń menen birge, 76 milliard sumlıq Nókis mámleketlik pedagogikalıq institutı jańa imaratınıń paydalanıwǵa tapsırılǵanı, 61 milliard sumlıq Muhammed al-Xorezmiy atındaǵı qánigelestirilgen mekteptiń qurılǵanı, 17 etajlı Ay-Ti Parktıń boy tiklegeni, qalaberse, 79 milliard sumlıq Gimnastika orayı hám 13 milliard sumlıq Gúres sheberligi sport mektepleriniń paydalanıwǵa tapsırılǵanı, Bozatawda 124 milliard sumlıq zamanagóy sanatoriyanıń ashılǵanı, 153 milliard sumlıq ilimiy-ámeliy medicina akademiyasınıń jumıs baslaǵanı, 27 milliard sum qarjı esabınan qurılǵan Konservatoriyanıń Nѳkis filialında barlıq qolaylı sharayatlar jaratılǵanı, Tórtkúl hám Ámiwdáryada 23 yarım milliard sumlıq zamanagѳy Amfiteatrlardıń qurıp pitkerilgeni, 61 milliard sum qarjı esabınan Qıstawlı medicinalıq járdem orayı, 11 milliard sumlıq Respublikalıq Tez járdem orayı, sonday-aq, Beruniy, Ellikqala, Tѳrtkúl hám Ámiwdárya rayonlarında 45 milliard sumlıq tuwıw kompleksleriniń paydalanıwǵa tapsırılǵanı, Balalar milliy medicina orayı Aralboyı klinikasınıń shѳlkemlestirilgeni xalqımız turmısındaǵı áhmietli waqıyalar qatarına kiredi.
Mine, usınday ilajlar nátiyjesinde, balalardı baqshalarǵa qamtıw dárejesi 2016-jıldaǵı 25 procentten – 84 procentke asırıldı, mektep pitkeriwshileriniń joqarı oqıw orınlarına kiriw kѳrsetkishi 2016-jılǵı 12 procentten 55 procentke jetkerildi, mekteplerde 3 smenalı oqıw tolıq saplastırıldı, jańadan 150 túrdegi emlew ámeliyatları jolǵa qoyılıp, Qaraqalpaqstan medicinası tariyxında 1-márte bawır hám búyrek kóshiriw, jurekte ashıq xirurgiyalıq operaciyalar tabıslı ámelge asırıldı.
Qádirli doslar!
Sońǵı jılları barlıq tarawlar qatarında awıl hám suw xojalıǵı, sharwashılıqtı rawajlandırıw baǵdarında da bir qatar ámeliy ilajlar alıp barılmaqta.
Atap aytqanda, 2017-2026-jıllarda 11 yarım mıń km kanal hám kollektorlarda 1 trln 139 milliard sumlıq qurılıs-ońlaw jumısları ámelge asırıldı. Jáne bir áhmietli máselelerdiń biri, diyqan hám fermerlerimizdiń tiykarǵı qol-qanatı bolǵan 11 yarım mıńǵa jaqın awıl xojalıǵı texnika hám agregatları alıp kelindi. Sonıń ishinde, 160 dana paxta teriw mashinaları hám 110 dana ǵálle orıw kombaynlarınıń alıp kelingeni – diyqanlarımızdıń bálent qırman jaratıwında ayrıqsha orın tutadı.
Sharwashılıq tarawında jańalıqlardıń biri sıpatında Oraylıq Aziyada 1-márte Xojeli rayonında násilli qaramallardıń embrionın islep shıǵarıw laboratoriyası iske tusirildi.
Húrmetli Watanlaslar!
Ѳzinde joqarı maqset hám iygilikli islerdi jámlegen bıyılǵı «Máhálleni rawajlandırıw hám jámietti ilgeriletiw jılı» da quwanıshlı hám umıtılmas waqıyalarǵa bay bolmaqta.
Mine, usınday waqıyalar qatarına Hurmetli Prezidentimizdiń qollap-quwatlawı menen Nókis qalasındaǵı Oraylıq qazanxananı kogeneraciya texnologiyasına ótkeriw jumısları baslap jiberilgenin ayrıqsha atap ѳtemiz.
Ulıwma bahası 83 million dollar bolǵan bul rekonstrukciya jumıslarınıń 1-basqıshında paytaxtımızdaǵı 23 mıńǵa shamalas xalıq jasaytuǵın kóp qabatlı turaq jaylar hám 40 sociallıq obektler sapalı ıssılıq penen támiyinlenedi.
Joqarıdaǵılar menen bir qatarda búgingi kúnde, Ámiwdárya, Beruniy, Qaraózek, Qońırat hám Moynaq rayonlarında 145 million dollarlıq ishimlik suw támiynatın jaqsılaw jumısları islenip atırǵanı, Nókis qalası, Taqıyatas hám Xojeli rayonlarınıń 286 km kanalizaciya tarmaqlarında 78 million dollarlıq qurılıs-ońlaw jumısları alıp barılıp atırǵanı, sonday-aq, «Miskin – Nókis» tez jurer poezdı liniyasın elektrlestiriw jumısları juwmaqlanıw aldında turǵanı, Tѳrtkúl, Beruniy hám Ellikqala rayonlarınan ѳtiwshi A-380 avtomobil jolınıń 92 km aralıǵında 303 million dollarlıq rekonstrukciya jumısları baslanǵanı, «Jańa Ѳzbekstan» kelbetindegi 2 rayon hám 32 máhallede, awır kategoriyadaǵı 4 rayon hám 102 máhálleniń infrastrukturasın jaqsılaw maqsetinde 403 obektte ulıwma 730 milliard sumlıq qurılıs-ońlaw jumıslarınıń alıp barılıp atırǵanı – iygilikli islerden sanaladı.
Qalaberse, sońǵı jılları Nókis qalasında jámietlik transport xızmetin rawajlandırıw maqsetinde sırt ellerden 78 milliard sumlıq 68 dana zamanagѳy avtobuslar alıp kelingen bolsa, usı jıl aqırına shekem qosımsha 160 tan aslam avtobuslar alıp keliniwi rejelestirilmekte. Sonıń menen birge, búgingi kúnde, Birlesken Arab Ámirliginiń «Sheyx Xalifa» fondı tǝrepinen bahası 28 million dollarlıq «Ana hǝm bala» klinikası qurılısı juwmaqlanbaqta, derlik 45 milliard sumlıq qarjı esabınan Respublikalıq Onkologiya medicina orayınıń imaratı jańadan boy tiklemekte. Bunnan tısqarı, Xojeli rayonında qıtaylı investorlar menen birgelikte bahası 400 million dollarlıq «Jaslar sociallıq-ekonomikalıq orayı»n shólkemlestiriw jumısları baslanbaqta. Álbette, xalqımızdıń aydın keleshegi menen baylanıslı bunday jańalıqlar haqqında uzaq sóz etiwimiz múmkin.
Áziz Watanlaslar!
Bıyılǵı bayram ilajların kѳp milletli xalqımız hár qashanǵıdan da joqarı dárejede kutip almaqta.
Ásirese, bayram múnásibeti menen qala ham rayonlarda, sonday-aq, barlıq máhállelerde «Ǵárezsizlik toyları» festivalları kѳterińki ruwxta ѳtkerilgeni, qalaberse, bayram aldınan sociallıq qorǵawǵa mútáj 101 jas shańaraqqa Prezident sawǵası – Jańa turaq jaylardıń tapsırılǵanı, bunnan tısqarı, sociallıq qorǵawǵa mútáj 186 shańaraqtıń turaq jayında «Jasıl ońlaw» baǵdarlaması tiykarında derlik 11 milliard sumlıq qurılıs-ońlaw jumıslarınıń ámelge asırılǵanı, 92 sociallıq taraw hám infrastruktura obektleriniń ashılǵanı, bir qatar zamanlaslarımız mámleketlik sıylıqlarǵa miyasar bolǵanı – bayramǵa jáne de kѳterińki ruwx hám xalqımızǵa joqarı keypiyat baǵıshlamaqta.
Húrmetli Watanlaslar!
Álbette, tınıshlıq hám tatıwlıqta jasap atırǵan Ǵárezsiz elimizge bárqulla usınday bayramlar jarasadı.
Solay eken, bársheńizdi jáne bir márte Ǵárezsizligimizdiń 35 jıllıq bayramı menen qızǵın kutlıqlap, Sizlerge bekkem densawlıq, shańaraqlarıńızǵa amanlıq, elimizdiń gúllep-rawajlanıwı jolındaǵı iygilikli isleriӊizde tasqın tabıslar tileymiz.
Amanbay Orınbaev
Qaraqalpaqstan Respublikası Joqarǵı Keńesiniń Baslıǵı