Ǵárezsizlik bayramı aldınan Tórtkúl vokzalı jańa kóriniste paydalanıwǵa tapsırıldı

Ózbekstan Respublikası Ǵárezsizliginiń 35 jıllıǵı qarsańında respublikamız boylap jańa sociallıq hám infrastrukturalıq obektler paydalanıwǵa tapsırılmaqta. Mine usınday obektler qatarında Tórtkúl temir jol vokzalınıń ashılıw máresimi bolıp ótti.

Atap ótiw orınlı, vokzal tolıq rekonstrukciyalanıp, jolawshılarǵa xızmet kórsetiwdiń sapasın hám qolaylıǵın arttırıwǵa qaratılǵan zamanagóy sharayatlar jaratıldı.

Rekonstrukciya jumısları sheńberinde vokzal imaratınıń ishki hám sırtqı bólegi jańalanıp, zamanagóy kútiw zalı shólkemlestirildi, jańa orınlıqlar ornatıldı, poezdlerdiń háreketi haqqında operativ maǵlıwmat beriwshi elektron málimleme tablosı engizildi hám biypul internet xızmeti jolǵa qoyıldı.

Imkaniyatı sheklengen hám mayıplıǵı bolǵan jolawshılar ushın da tiyisli qolaylıqlar jaratıldı. Sırtqı aymaq abadanlastırılıp, kóklemzarlastırıw jumısları ámelge asırıldı. Sonıń menen birge, vokzal aymaǵında usaqlap satıw, bankomat, baylanıs úskeneleri hám ofis xızmetleriniń jumısı jolǵa qoyılǵan.