Bayram qarsańında Qaraqalpaqstan ilimiy-tájiriybe stanciyası paydalanıwǵa tapsırıldı

Búgingi kúnde Ózbekstan Respublikası Ǵárezsizliginiń 35 jıllıq bayramı elimiz boylap keńnen belgilenbekte. Ásirese, bayram aldınan jańa sociallıq hám infrastruktura obektleriniń paydalanıwǵa tapsırılıp atırǵanı watanlaslarımızǵa jáne de kóterińki keypiyat baǵıshlamaqta.

Usınday áhmietli ilajlardan biri Nókis rayonı "Qutankól" awıl puqaralar jıyını aymaǵında bolıp ótti. Bul jerde Oraylıq Aziya qorshaǵan ortalıq hám klimat ózgeriwin úyreniw universiteti - GREEN UNIVERSITY hám Toǵay xojalıǵı ilimiy-izertlew institutı quramındaǵı Qaraqalpaqstan ilimiy-tájiriybe stanciyasınıń ashılıw máresimi ótkerildi.

Bul obektti qurıw ushın 8 milliard sum qarjı ajıratılǵan bolıp, ilimiy-tájiriybe stanciyasınıń iske túsiriliwi Qaraqalpaqstanda ekologiya, toǵayshılıq, klimat ózgeriwi hám tábiyǵıy resurslardan aqılǵa uǵras paydalanıw baǵdarlarında ilimiy-izertlew jumısların bunnan bılay da rawajlandırıw ushın áhmietli qádem boldı.