Eń ullı hám eń áziz bayram múnásibeti menen bir topar Watanlaslarımızǵa mámleketlik sıylıqlar tapsırıldı

Búgin Qaraqalpaqstan Respublikası Joqarǵı Keńesinde Ózbekstan Respublikası ǵárezsizliginiń otız bes jıllıǵı múnásibeti menen elimizdiń rawajlanıwı jolında ayanbay miynet etip atırǵan, ǵárezsizligimizdi ele de bekkemlew, ósip kiyatırǵan jas áwladtı Ana-Watanǵa sadıqlıq ruwxında tárbiyalawda jemisli miynet etip atırǵan bir qatar watanlaslarımızdı sıylıqlaw máresimi bolıp ótti.

Onda Joqarǵı Keńes Baslıǵı Amanbay Orınbaev shıǵıp sóylep, ǵárezsizligimizdiń otız bes jıllıǵı múnásibeti menen jıynalǵanlardı qutlıqladı.

Ótkerilgen ilajda Joqarǵı Keńes Prezidiumı qararına muwapıq, elimizdi hár tárepleme rawajlandırıw hám xalqımızdıń abadan turmısın támiyinlew jolındaǵı pidákerli miynetleri, jámietimizde milletleraralıq doslıq hám tatıwlıqtı bekkemlew, jas áwladtı Watandı súyiwshilik hám ǵárezsizlik ideyalarına sadıqlıq ruwxında tárbiyalaw hámde jámietlik-siyasiy turmıstaǵı belsendiligi ushın bir topar watanlaslarımız húrmetli ataqlar hám kókirek belgileri menen sıylıqlandı.

Sonday-aq, jaslarımız arasında kiberjınayatlarǵa qarsı gúresiw hám narkomaniyanıń awır aqıbetleri nátiyjesinde júzege keliwi múmkin bolǵan jaǵdaylardıń aldın alıw baǵdarında úgit-násiyat jumısların keńnen en jaydırıw maqsetinde ótkerilgen «Náshebentlikke qarsı gúresiw» hám «Kiberjınayatqa qarsı gúresiw» tańlawı jeńimpazlarına aqshalay sıylıqlar tapsırıldı.