Ózbekstan Respublikası ǵárezsizliginiń otız bes jıllıǵı keń túrde belgilendi

Paytaxtımız Nókis qalasındaǵı oraylıq Amfiteatrda elimiz ǵárezsizliginiń otız bes jıllıǵına baǵıshlanǵan «Bir Watan, bir xalıq bolıp, jańa turmıs hám keleshek quramız!» degen uran astında bayram saltanatı bolıp ótti.

Saltanatlı ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, gúllán xalqımızdı eń ullı, eń muqaddes áyyyam – elimiz ǵárezsizliginiń otız bes jıllıǵı bayramı menen qızǵın qutlıqladı.

Atap ótilgenindey, sońǵı jılları hurmetli Prezidentimiz basshılıǵında barlıq aymaqlar qatarında Qaraqalpaqstanda da keń kólemli reformalar ámelge asırılıp, elimizdi sociallıq-ekonomikalıq jaqtan rawajlandırıwǵa ayrıqsha itibar qaratılmaqta. Bul baǵdarda Prezidentimiz tarepinen Qaraqalpaqstan ushın óz aldına qabıl etilgen bir qatar áhmietli párman hám qararlar xalqımızǵa múnásip turmıs sharayatın jaratıwǵa bekkem tiykar bolıp xızmet etpekte.

Sonıń menen birge, elimizde kishi biznes hám isbilermenlik, sanaat, xızmet kórsetiw hám awıl xojalıǵı sıyaqlı tarawlarda bir qatar investiciyalıq joybarlar ámelge asırıldı. Bunıń nátiyjesinde xalqımız ushın jaӊa jumıs orınları jaratılıp, bir qatar iri óndiris kárxanaları, kóplegen sociallıq obektler iske túsirildi.

Usı jıldıń ózinde barlıq tarawlarda da joqarı nátiyjelerge erisilip, xalqımızdıń abadan turmısın támiyinlew boyınsha ilajlar keń túrde dawam ettirilmekte.

Saltanatlı bayram ilajı koncert baǵdarlaması menen dawam etti. Baǵdarlamadan orın alǵan kórkem óner sheberleri hám jas talant ieleri atqarıwındaǵı Watan, doslıq, tınıshlıq hám tatıwlıq, jaslıq haqkındaǵı qosıqlar hám ayaq oyınlar jıynalǵanlarǵa kóterińki keypiyat baǵıshladı.