Prezidentimiz tárepinen berilgen sıylıqlar óz ielerine tapsırıldı

Jaqında húrmetli Prezidentimiz Shavkat Mirziyoev Qaraqalpaqstan Respublikasına kelgen edi. Qaraqalpaqstanǵa sapar sheńberinde «Coals KS» kárxanası jumısı menen tanısıw barısında Anvar Shukurovti izleniwsheńlik hám baslamashılıq pazıyletleri menen keń tarmaqlı isbilermenlik jumısın jolǵa qoyıp, kóplegen áhmietli investiciyalıq joybarlardı tabıslı ámelge asırıp kiyatırǵanı ushın « O‘zbekiston Respublikasida xizmat ko‘rsatgan ixtirochi va ratsionalizator » húrmetli ataǵı menen sıylıqlaw haqqında tapsırma berdi.

Sonday-aq, Nókis rayonı «Diyqan arna» máhállesinde pal hárreshilik penen shuǵıllanıp kiyatırǵan Jubaev Baxtiyardıń shańaraǵında boldı hám mámleketimizde isbilermenlerge jaratılǵan keń imkaniyatlardan nátiyjeli paydalanıp, óziniń izleniwsheńligi hám isbilermenligi menen elimizde pal hárreshilikti rawajlandırıw, jámiette óz-ara awızbirshilik hám miyrim-shápáát ortalıǵın bekkemlewdegi xızmetlerin atap ótti hám miynetkesh isbilermendi «Do‘stlik» ordeni menen sıylıqlaw boyınsha tapsırma berdi.

Qaraqalpaqstan Respublikası Joqarǵı Keńesiniń Baslıǵı Amanbay Orınbaev húrmetli Prezidentimizdiń arnawlı pármanları tiykarında Shukurov Anvar Ismatovichke « O‘zbekiston Respublikasida xizmat ko‘rsatgan ixtirochi va ratsionalizator» húrmetli ataǵın, Jubaev Baxtiyar Taylakovichke «Do‘stlik» ordenin tapsırdı.

Onda jıynalǵanlar bul berilgen sıylıqlar húrmetli Prezidentimizdiń xalqımızǵa bolǵan ayrıqsha itibarı hám ǵamxorlıǵınıń jáne bir kórinisi ekenligin atap ótip, mámleketimiz basshısına sheksiz minnetdarshılıǵın bildirdi.