«Duzdı qayta islew boyınsha xalıqaralıq investiciya forumı»nıń ashılıwına arnalǵan ilaj bolıp ótti

Búgin Nókis qalasındaǵı «Aq quw» kompleksinde «Duzdı qayta islew boyınsha xalıqaralıq investiciya forumı»nıń ashılıwına arnalǵan ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, qatnasıwshılardı  forum ashılıwı múnásibeti menen qutlıqladı.

Atap ótiw orınlı, sońǵı jılları elimizde húrmetli Prezidentimiz tárepinen xalıqaralıq ekonomikalıq qatnasıqlardı rawajlandırıwǵa, Qaraqalpaqstannıń investiciyalıq tartımlıǵın arttırıwǵa, aymaqta isbilermenlerdi qollap-quwatlawǵa ayrıqsha itibar qaratılmaqta.

Búgingi xalıqaralıq forum jumısı da usınday ilajlardıń nátiyjesi bolıp, onda 20 ǵa jaqın mámleketten 100 den artıq investorlar qatnaspaqta.

Ótkerilgen forum sheńberinde aymaǵımızdıń bar bolǵan potencialı, infrastrukturalıq artıqmashılıqları, berilgen jeńillikler, sonday-aq, altın, mıs, magniy, kobalt, nikel, kvarc, bentonit hám basqada mineral shiyki zatlar kánlerine ie ekenligi, sonıń ishinde derlik tawsılmas rezervke ie 110 mıń gektarda jaylasqan «Barsakelmes» duz kániniń imkaniyatları haqqında maǵlıwmat berildi.

Bunnan soń B2B formatındaǵı ushırasıwlar ótkerilip, onda perspektivalı joybarlar boyınsha sóylesildi.