Múddetli áskeriy xızmettegi jaslar ushın kásipke oqıtıw hám joqarı oqıw ornına tayarlaw orayları paydalanıwǵa tapsırıldı

Búgin Arqa-Batıs áskeriy okruginde qayta ońlawdan shıǵarılıp, zamanagóy kóriniske keltirilgen kásipke oqıtıw hám joqarı oqıw ornına tayarlaw orayları imaratlarınıń ashılıwına arnalǵan ilaj ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı imaratlar ashılıwı múnásibeti menen qutlıqladı.

Atap ótilgenindey, sońǵı jılları húrmetli Prezidentimizdiń basshılıǵında miliy armiyamızdıń jawıngerlik potencialın arttırıw, áskeriy xızmetkerlerdiń xızmet hám turmıs sharayatların jaqsılaw, múddetli áskeriy xızmetti ótep atırǵan jaslardıń kásip úyreniw hám bilim alıwǵa bolǵan qızıǵıwshılıǵın qollap-quwatlaw baǵdarında keń kólemli ilajlar ámelge asırılmaqta.

Zamanagóy kóriniske keltirilgen Kásipke oqıtıw hám Joqarı oqıw ornına tayarlaw orayları imaratlarınıń paydalanıwǵa tapsırılıwı – usınday maqsetlerdi ózinde jámlegen iygilikli islerden sanaladı.

Jámi 5 mlrd. sum qarjı esabınan qayta ońlawdan shıǵarılǵan imaratlarda barlıq qolaylı sharayatlar jaratılǵan. Albette, bul oraylarda múddetli áskeriy xızmetti ótep atırǵan jaslar bilim alıp, ózleri qızıqqan kásip sırların úyrenedi.