«Ózbekstan - birden-bir Watan!» atamasında konferenciya bolıp ótti

Usı jıldıń 28-sentyabr kúni Tashkent qalasınan jolǵa shıqqan «Doslıq poezdı» respublikamızda jasap atırǵan túrli millet wákillerin Qaraqalpaqstan Respublikasına jámledi.

Usı múnásibet penen 29-sentyabr kúni Nókis qalasındaǵı «Aq quw» kompleksinde «Ózbekstan - birden-bir Watan!» súreni astında elimizdegi barlıq millet hám xalıq wákilleriniń óz-ara teńligi, awızbirshiligi jáne Jańa Ózbekstannıń rawajlanıwına qosıp atırǵan úlesin atap ótiwge baǵıshlanǵan konferenciya ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı ilajdıń ashılıwı múnásibeti menen qutlıqladı.

Konferenciyada Milletleraralıq qatnasıqlar komiteti, Respublikalıq Ruwxıy-aǵartıwshılıq orayı, «Vatandoshlar» jámietlik fondı, sırt ellerdiń milletleraralıq qatnasıqlar boyınsha arnawlı shólkemleri hám basqa da shólkemlerdiń juwapkerleri, sonday-aq, milliy mádeniy oraylardıń belsendileri hám keń jámietshilik wákilleri qatnastı.

Tiykarǵı maqseti jámietimizde milletleraralıq tatıwlıq hám awızbirshilikti bekkemlew, túrli millet wákillerin birden-bir Watan tuyǵısı átirapında birlestiriw, olardıń mámleketimizdiń sociallıq hám mádeniy turmısında belsene qatnasıwın qollap-quwatlawdan ibarat bolıp, mámleketimizdiń tiykarǵı baylıǵı kóp milletli xalqımız hám tınıshlıǵımız ekeni ayrıqsha atap ótildi.

Konferenciyada milleti, tili hám mádeniyatına qaramastan, hár bir insannıń elimizdiń rawajlanıwına baylanıslıǵın kúsheytiw, óz-ara húrmet hám teńlik principlerin engiziw, mádeniy kóp túrlilikti qásterlep saqlaw máselelerine itibar qaratıldı.

Álbette, «Ózbekstan - birden-bir Watan!» ideyası tiykarında ótkerilgen bul konferenciya Watanǵa sadıqlıq sezimin bekkemlew, tınıshlıq hám tatıwlıqtı qádirlew, mámlekettiń rawajlanıwı jolında awızbirshilikti kúsheytiwge xızmet etti.