Sırt elli investorlar «Barsakelmes» duz kániniń imkaniyatları menen tanıstı

Nókis qalasındaǵı «Aq quw» kompleksinde «Duzdı qayta islew boyınsha xalıqaralıq investiciya forumı»nıń ashılıwına arnalǵan ilaj bolıp ótken edi.

Bul xalıqaralıq forumda 20 ǵa jaqın mámleketten 100 den artıq investorlar qatnasıp, onda perspektivalı joybarlar ústinde birge islesiw boyınsha sóylesiwler alıp barıldı.

Sonday-aq, derlik tawsılmas rezervke ie «Barsakelmes» duz kániniń imkaniyatları investorlar tárepinen ornına barıp kórildi.

Atap ótiw orınlı, «Barsakelmes» duz kániniń ulıwma maydanı 110 mıń gektardı qurap, búgingi kúnde onıń tek 10 mıń gektarǵa jaqın bólegi ǵana ózlestirilgen.

Mine usınday shiyki zat bazası negizinde keminde 19 túrdegi ximiyalıq tayar ónim islep shıǵarıw múmkinshiligi bar.

Óz náwbetinde, sırt elli birge islesiwshiler duz káni imkaniyatların kózden ótkerip, bul rezerv imkaniyatlarınan ele de keńirek paydalanıw hám jańa joybarlar álbette, iske qosılıwı kerek ekenligin atap ótti.