Xojeli rayonında Jaslar sociallıq-ekonomikalıq orayınıń qurılıs jumısları baslandı

Húrmetli Prezidentimizdiń Qaraqalpaqstanǵa bolǵan saparı dawamında Qaraqalpaqstanda 47 jańa joybarǵa start berilgen edi. Búgin Xojeli rayonında usı joybarlardıń biri yaǵnıy, Jaslar sociallıq-ekonomikalıq orayınıń qurılıs jumıslarınıń baslanıwına arnalǵan saltanatlı máresim bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jańa joybar baslanıwı múnásibeti menen jıynalǵanlardı qutlıqladı.

Atap ótilgenindey, Nókis qalasınan 8 kilometr, Xojeli rayonı orayınan 5 kilometr uzaqlıqta jaylasqan bul joybardıń ulıwma maydanı 152 gektardı qurap, bul jerde tek turaq jaylar ǵana emes, zamanagóy qalasha qurıw rejelestirilgen.

Atap aytqanda, balalar baqshası, mektep, emlewxana, sawda obektleri, miymanxana, sport kompleksi hám dem alıw zonaları jaratılıwı názerde tutılǵan. Qalashada ulıwma 221 kóp qabatlı turaq jay qurılıp, nátiyjede 47 mıńnan aslam xalıqtı qolaylı turaq jay menen támiyinlew imkaniyatı jaratıladı.

Búgingi ilajda usı úlken joybardıń birinshi basqıshı baslanıp, onda qıtaylı investorlar tárepinen 7 qabatlı 38 turaq jay, 3 sawda kompleksi, sonday-aq, beton ónimleri hám basqa da islep shıǵarıw kárxanaların qurıw rejelestirilgen.

Albette, bul jańa joybar nátiyjeli ámelge asırılıp, xalqımız iygiligi jolında xızmet etedi.