Xalıqaralıq forum sheńberinde áhmietli kelisimlerge erisildi

Nókis qalasındaǵı «Aq quw» kompleksinde Ózbekstan (Qaraqalpaqstan) – Qıtay aymaqlar aralıq sawda-ekonomikalıq forumı ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı forum ashılıwı múnásibeti menen qutlıqladı.

Ótkerilgen forumda Ózbekstan Respublikası investiciyalar, sanaat hám sawda ministriniń orınbasarı I.Kasimov, Ministrler Keńesiniń Baslıǵı F.Ermanov, isbilermenler, Qıtay mámleketinen kelgen investorlar qatnastı.

Sonı ayrıqsha aytıw kerek, eki mámleket basshıları arasındaǵı doslıq qatnasıqları nátiyjesinde sońǵı jılları Ózbekstan-Qıtay arasındaǵı sawda-ekonomikalıq hám investiciyalıq birge islesiwler jańa basqıshqa kóterilip barmaqta.

Ótkerilgen forumda mine usı baǵdardaǵı ilájlardan biri bolıp, onda 400 ge jaqın isbilermenler qatnastı. Forumda Qaraqalpaqstannıń bar bolǵan potencialı, aymaq ushın óz aldına berilgen jeńillikler, jańa investiciyalıq joybarlardı ámelge asırıw ushın sebep bola alatuǵın artıqmashılıq tárepleri atap ótildi.

Forum sheńberinde taw-kán sanaatı, geologiya, IT, awıl xojalıǵı hám basqa da baǵdarlar boyınsha 31 investiciyalıq joybar sheńberinde 410 million dollarlıq kelisimlerge qol qoyıldı.