«Kámbaǵallıqtan — abadanlıqqa qaray» háreketleri Tórtkúl rayonında sistemalı túrde dawam ettirilmekte

Búgingi kúnde xalqımızdıń abadanlıǵın támiyinlew, xalıqtıń bántligin arttırıw hám shańaraqlardıń dáramatın kóbeytiw jolında ámeliy jumıslar sistemalı túrde dawam etpekte.

Mine usınday iygilikli isler qatarında Tórtkúl rayonınıń orayınan alısta jaylasqan «Qumbasqan» awıl puqaralar jıyınında «Kámbaǵallıqtan — abadanlıqqa qaray» atamasında áhmiyetli ushırasıw bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, húrmetli Prezidentimiz tárepinen aymaqlardı rawajlandırıw, insan qádirin ulıǵlaw jolında kórsetilip atırǵan joqarı itibar hám berilip atırǵan jeńilliklerge ayrıqsha toqtap ótti.

Búgingi ilaj tek ǵana ushırasıw emes, al, puqaralardıń real dáramatın arttırıwǵa qaratılǵan anıq hám ámeliy qádem boldı.

Jumıssız hám sociallıq reestrge kirgizilgen xalıq qatlamı ushın mámleketimiz tárepinen jaratılǵan barlıq jeńillikler, subsidiyalar hám járdem túrleri tolıq túsindirildi.

Ushırasıw sheńberinde, aymaqta isbilermenlikti rawajlandırıw ushın kishi joybarlarǵa mólsherlengen zamanagóy ásbap-úskeneler hám mini cexlar kórgizbesi shólkemlestirildi.

Kórgizbede kórsetilgen úskenelerdi satıp alıw hám tólemlerdi ámelge asırıwda jaratılǵan qolaylı sharayatlar puqaralarǵa óz biznesin baslap, ózin-ózi bánt etiwi hám turaqlı dáramat dáregine iye bolıwı ushın real múmkinshilik jarattı.

Sonday-aq, bul ásbap-úskenelerdi alıwda subsidiya, ssuda, jeńilletilgen kreditler sıyaqlı jaratılǵan imkaniyatlar tanıstırıldı.

Ushırasıwdan soń Joqarǵı Keńes Baslıǵı puqaralardıń shańaraqlarında bolıp, olardıń sharayatları menen tanıstı.

Kún dawamında Joqarǵı Keńes Baslıǵınıń tapsırması menen juwapkerlerdiń qatnasıwında shólkemlestirilgen kóshpeli qabıllaw xalıq penen tikkeley pikirlesiw maydanına aylandı.