Puqaralardıń dáramatın arttırıw baǵdarında ámeliy jumıslar dawam ettirilmekte

Húrmetli Prezidentimizdiń tapsırmasına tiykar búgingi kúnde «Kámbaǵallıqtan – abadanlıqqa qaray» háreketi dawam ettirilip, usı tiykarda orınlarda jumıssız puqaralardıń bántligin támiyinlew, járdemge hám sociallıq qollap-quwatlawǵa mútáj xalıq qatlamınıń dáramatın arttırıw baǵdarında keń kólemli ilajlar ámelge asırılmaqta.

Mine usınday iygilikli baslama tiykarında Xojeli rayonında bos jumıs orınları hám úy sharayatında kishi biznes penen shuǵıllanıw ushın arnawlı ásbap-úskeneler yarmarkası ótkerildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, óz isbilermenligin baslap, dáramatın arttırıw qálewshiligi bar puqaralar ushın barlıq járdemler kórsetiletuǵınlıǵın atap ótti.

Yarmarkada sonday-aq, jumıssız hám sociallıq reestrge kirgizilgen xalıq qatlamı ushın mámleketimiz tárepinen jaratılǵan barlıq jeńillikler, subsidiyalar hám járdem túrleri tolıq túsindirildi, zárúr maǵlıwmatlar berilip, imkaniyatlar kórsetildi.

Bunnan tısqarı, úy sharayatında óz biznesin baslap, qosımsha dáramat alıw niyetinde bolǵan puqaralar ushın sol orınnıń ózinde arnawlı ásbap-úskeneler tarqatıldı.