Shomanay rayonında pán olimpiadasınıń jeńimpazları sıylıqlandı

Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qatnasıwında Shomanay rayonında pán olimpiadasınıń rayonlıq basqıshında jeńimpaz bolǵan oqıwshılar hám olardıń ustazların sıylıqlawǵa arnalǵan ilaj bolıp ótti.

Onda Joqarǵı Keńes Baslıǵı búgingi kúnde elimizde jas áwladtıń bilim alıwı, intellektuallıq potencialın arttırıwı hám óz talantın júzege shıǵarıwı ushın jaratılıp atırǵan keń imkaniyatlar haqqında ayrıqsha atap ótti.

Atap ótilgenindey, húrmetli Prezidentimiz tárepinen jaslarǵa qaratılıp atırǵan joqarı itibar, bilimlendiriw tarawında ámelge asırılıp atırǵan reformalar jaslardıń tereń bilim alıwı, zamanagóy kásip-ónerlerdi iyelewi hám keleshekte Watanımızdıń rawajlanıwına múnásip úles qosatuǵın jetik insan bolıp kámalǵa keliwinde tiykar bolıp xızmet etpekte.

Búgingi ilajday pán olimpiadasınıń jeńimpazların xoshametlew oqıwshılardı jáne de kóbirek izleniwge, jańa sheklerdi iyelewge baslaw menen birge, olardıń tálim-tárbiyasına miynetin baǵıshlap atırǵan ustazlardıń xızmetlerin qádirlewdiń áhmiyetli kórinisi bolıp esaplanadı.

Haqıyqatında da, bunday itibar hám xoshametlew jaslardıń ilimge bolǵan qızıǵıwshılıǵın jáne de arttırıp, qábiletli oqıwshılardı qollap-quwatlaw, sapalı bilimlendiriwdi rawajlandırıw jáne keleshekte jetik hám maman kadrlardı tárbiyalawda úlken áhmiyetke iye esaplanadı.