Qaraózek rayonında ámelge asırılıp atırǵan jumıslar barıp kórildi

Búgin Qaraqalpaqstan Respublikası Joqarǵı Keńesi Baslıǵınıń orınbasarı R.Nurazizov Qaraózek rayonında bolıp, ámelge asırılıp atırǵan joybarlar menen tanıstı.

Atap ótiw orınlı, húrmetli Prezidentimizdiń tapsırması menen qala hám rayonlarımızǵa biriktirilgen wálayatlar tárepinen ámeliy ilajlar dawam ettirilmekte. Usı qatarda, búgingi kúnde Qaraózek rayonında Namangan wálayatı tárepinen drayver joybarlardı ámelge asırıw, xızmet kórsetiw tarawın rawajlandırıw maqsetinde 42 jumıssız jaslardıń bántligin támiyinlewge qaratılǵan jámi 14 dana xızmet kórsetiw kishi joybarı shólkemlestirilmekte.

Sonday-aq, «Qutlı mákan» máhállesinde 6 mlrd. sumlıq jańadan amfiteatr, 3 mlrd. sumlıq kitapxana, 1,5 mlrd. sumlıq «Ǵárezsizlik gúzarı» máhállesinde máhálle imaratın qurıw belgilengen.

Bunnan tısqarı, rayonda Prezidentimizdiń 49-sanlı qararı tiykarında oraydaǵı kollektor ornında jabıq drenaj sistemasın qurıw, «K. Kamalov» hám «Rayxan» kóshelerin xalıq seyil etetuǵın orınǵa aylandırıw, sonday-aq, zamanagóy sawda hám xızmet kórsetiw obektlerin shólkemlestiriw, «Nókis-Taxtakópir» jolı boyındaǵı jaslar alleyasın qayta ońlaw jumısları ámelge asırılıp, 15 mlrd. sumlıq jańa toyxana xızmetin shólkemlestiriw joybarı da dawam ettirilmekte.

Joqarǵı Keńes Baslıǵınıń orınbasarı ámelge asırılıp atırǵan joybarlar menen tanıstı, «Jáhánger Qállibek» jeke menshik agrofirması jumısların barıp kórdi.

Bul joybardıń ámelge asırılıwı rayonda xızmet kórsetiw tarawın rawajlandırıwǵa, xalıq ushın qolaylı sharayatlar jaratıwǵa hám jańa jumıs orınların ashıwǵa xızmet etetuǵınlıǵın atap ótti.