Joqarǵı Keńes Baslıǵı Beruniy rayonında jaslar menen ushırastı

Prezidentimiz tárepinen alǵa qoyılǵan hám búgingi kúnde turaqlı ámelge asırılıp atırǵan "Hár piyshembi - Jaslar kúni" baslaması elimizde jaslar menen islesiwdiń pútkilley jańa, nátiyjeli hám mánzilli sistemasın qáliplestirmekte. Bul baslama jaslardıń tek ǵana mashqalaların tıńlaw emes, al olardıń arzıw-niyetlerin júzege shıǵarıw, potencialın tolıq kórsetiwi ushın bekkem tiykar jaratpaqta.

Usı ilajlardıń sheńberinde búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Beruniy rayonındaǵı bir qatar jumıssız hám atalıqqa alınǵan jaslar menen ushırasıw ótkerdi.

Atap ótilgenindey, elimizde jaslardı hár tárepleme qollap-quwatlaw mámleketlik siyasattıń baslı baǵdarlarınıń biri esaplanadı.

Ótkerilgen ushırasıwda bul baǵdarda jaslarǵa jaratılıp atırǵan imkaniyatlar keńnen túsindirildi. Sonıń menen birge, mine, usı imkaniyatlardan únemli paydalanıp, hár qıylı baǵdarlarda joqarı nátiyjelerge erisip atırǵan jaslardıń qatarı barǵan sayın keńeyip atırǵanı ayrıqsha tilge alındı.

Ushırasıw dawamında jaslar belsendilik kórsetip, ózlerin qızıqtırıp atırǵan máseleler, ámelde ushırasıp atırǵan mashqalalar hám alǵa qoyılıp atırǵan usınıs hám baslamalar tikkeley bildirdi.

Hár bir kóterilgen másele Joqarǵı Keńes Baslıǵınıń jeke qadaǵalawına alınıp, taraw juwapkerlerine olardı qısqa múddetlerde unamlı sheshiw boyınsha anıq tapsırmalar berildi.