Bir topar perzentlerimizge jáne kúlki inám etken shıpakerlerge minnetdarshılıq bildirildi

Húrmetli Prezidentimiz tárepinen barlıq tarawlar qatarında medicina tarawına qaratılıp atırǵan itibar nátiyjesinde búgingi kúnde tarawda ámelge asırılıp atırǵan jumıslar jańa basqıshqa kóterilip barmaqta.

Mine usınday iygilikli ilajlar qatarında jaqında respublikamızda ekinshi márte «Kúlki inám etemiz («Darim ulıbku») xalıqaralıq qayırqomlıq fondı tárepinen akciya ótkerildi. Bul akciya sheńberinde 180 nen aslam nawqas bala medicinalıq tekseriwden ótkerildi. Sonnan, 60 qa jaqın balada quramalı xirurgiyalıq operaciyalar biypul ámelge asırıldı. Nátiyjede, shın mánisinde bul balalarǵa kúlki, olardıń jaqınlarına quwanısh inám etildi.

Búgin usı akciyanı ótkeriwde belsendilik kórsetken sırt elli shıpakerler menen ushırasıw ótkerilip, olarǵa minnetdarshılıq bildirildi.

Qaraqalpaqstan Respublikası Joqarǵı Keńesiniń Baslıǵı Amanbay Orınbaev bul islengen iygilikli baslamanı xalqımız joqarı dárejede bahalaytuǵınlıǵı hám qádirleytuǵınlıǵın atap ótti.

Ilaj dawamında Joqarǵı Keńes Prezidiumı qararı menen bir topar qánigeler múnásip bahalandı hám kókirek belgisi, bahalı sawǵalar tapsırıldı.