Nókis rayonında tomat zavodı iske túsirildi

Búgin Nókis rayonında pomidordan «Aydınlar» brendi astında tomat pastasın islep shıǵarıwshı jańa zavodtıń ashılıw máresimi bolıp ótti.

Onda Ózbekstan Respublikası Prezidentiniń keńesgóyi T.Xudaybergenov, Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Ministrler Keńesiniń Baslıǵı F.Ermanov qatnastı.

Atap ótilgenindey, sońǵı jılları húrmetli Prezidentimiz tárepinen Qaraqalpaqstan ushın óz aldına berilgen jeńillikler hám imkaniyatlar nátiyjesinde jańa kárxanalar sanı artıp, kóplegen joybarlar iske túsirilmekte.

Mine usınday joybarlardıń biri bolǵan tomat islep shıǵarıw zavodı ulıwma 15 mlrd. sum qarjı esabınan iske túsirildi. Nátiyjede, sutkasına 70 tonna ónimdi qayta islew hám jılına 1000 tonnadan aslam tayar ónim islep shıǵarıw quwatlıǵı, jaslar ushın bolsa 40 qa jaqın jumıs ornı jaratıldı.

Albette, bul joybardıń iske túsiriliwi jergilikli pomidor ónimlerin eksportbap usılda qayta islewge, rayonnıń ekonomikalıq potencialın arttırıwǵa hám rayon xalqınıń iygiligi jolında uzaq jıllar dawamında xızmet etedi.

Ótkerilgen ilaj dawamında nuranıy-aqsaqallar, aymaq turǵınları jańa zavod jumısları menen jaqınnan tanıstı.