«Kásiplik awqamları kúni» bayramı belgilendi

Búgin Nókis qalasındaǵı záwlim orınlardıń birinde «Kásiplik awqamları kúni» múnásibeti menen bayram ilajı ótkerildi.

Onda Qaraqalpaqstan Respublikası Joqarǵı Kenesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.

Atap ótilgenindey, sońǵı jılları húrmetli Prezidentimiz tárepinen puqaralardıń miynet huqıqların qorǵawǵa, xalıqtıń bántligin támiyinlewge hayal-qızlardı hám jaslardı qollap-quwatlawǵa, kámbaǵallıqtı qısqartıwǵa ayrıqsha itibar qaratılıp, bul baǵdarda keń kólemli ilajlar alıp barılmaqta.

Álbette, bunday iygilikli islerdi ámelge asırıwda kásiplik awqamları xalıqshıl hám demokratiyalıq struktura sıpatında múnásip úles qosıp kelmekte. Sol qatarda usı jılı sociallıq qorǵawǵa mútáj, napaqadaǵı hám mayıplıǵı bolǵan hám ózgeler kútimine mútáj shaxslarǵa, kem támiyinlengen shańaraqlardıń perzentlerine materiallıq járdemler kórsetildi. 9 mıńǵa jaqın xızmetker hám olardıń shańaraq aǵzaları ushın sayaxatlar shólkemlestirildi. Puqaralardıń miynet jámáátlerindegi huqıqları tiklew jumısları dawam ettirildi.

Búgingi ótkerilgen ilajda da mine usınday jumıslar keń túrde sóz etildi. Sonday-aq, bir topar taraw wákilleri Qaraqalpaqstan Respublikası Joqarǵı Kenesiniń Prezidium qararı menen kókirek belgileri hám Húrmet jarlıǵı menen sıylıqlandı.

Ilaj kórkem óner hám mádeniyat xızmetkerleri atqarıwındaǵı koncert baǵdarlaması menen dawam etti.