Qanlıkól rayonında bántlik hám isbilermenlik yarmarkası shólkemlestirildi

Búgingi kúnde xalıqtıń mútáj qatlamın qollap-quwatlaw, olardı dáramatlı qılıw hám isbilermenligin baslawına kómeklesiw maqsetinde ámeliy ilajlar dawam ettirilmekte.

Usınday ilajlar qatarında búgin Qanlıkól rayonında sociallıq qollap-quwatlawǵa mútáj shańaraqlar ushın bántlik hám isbilermenligin baslaw ushın arnawlı ásbap-úskeneler yarmarkası shólkemlestirildi.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, mútáj shańaraqlardı qollap-quwatlaw baǵdarındaǵı ilajlar bunnan-bılay da dawam ettiriletuǵınlıǵın atap ótti.

Yarmarkada úy sharayatında biznes baslaw ushın zárúr texnikalar, ásbap-úskeneler, sonday-aq, sociallıq qollap-quwatlawǵa mútáj shańaraqlar ushın berilgen jeńillikler hám imkaniyatlar prezentaciyası tanıstırıldı.

Jumıssız hám sociallıq reestrge kirgizilgen xalıq qatlamı ushın barlıq jeńillikler, subsidiyalar hám járdem túrleri tolıq túsindirildi, zárúr maǵlıwmatlar berilip, imkaniyatlar kórsetildi.

Olardın hár qanday baslaması qollap-quwatlanatuǵınlıǵı atap ótildi.