"Qaraqalpaqstan Respublikasında alıp barılıp atırǵan reformalardı jáne de jedellestiriwge qaratılǵan ilajlar haqqında"ǵı Ózbekstan Respublikası Prezidentiniń 393-sanlı qararı menen:
Xalıqtıń kúndelikli turmısındaǵı kommunal hám basqa da tarawlardaǵı keshiktirip bolmaytuǵın máselelerdi operativ sheshiw maqsetinde:
- 2026-2027-jıllarda Qaraqalpaqstan Respublikası sociallıq infrastrukturasın rawajlandırıw baǵdarlaması tastıyıqlanadı;
Baǵdarlamanı qarjılandırıwǵa 160 milliard sum qarjı buyırtpalarǵa muwapıq basqıshpa-basqısh ajıratıp barıladı.
Bunda usı qarjılar:
-17 ulıwma bilim beriw mektebi hám mektepke shekemgi bilimlendiriw shólkemlerin jasıl principler tiykarında ońlawǵa;
- medicina mákemeleriniń materiallıq-texnikalıq bazasın, atap aytqanda, 30 lift hám 20 sanitariyalıq-gigienalıq infrastrukturasın jaqsılaw jáne zárúr medicinalıq úskeneler menen támiyinlewge;
- Ámiwdárya hám Xojeli rayonlarındaǵı 2 kishi sanaat zonası hám 2 xızmet kórsetiw obektleriniń infrastrukturasın jaqsılawǵa;
- Ellikqala rayonı "A.Nawayı" MPJ aymaǵında jaylasqan "Bostan" suw bólistiriw imaratın rekonstrukciyalawǵa baǵdarlanadı.
❗️Awıl xojalıǵı hám sharwashılıqtı rawajlandırıw maqsetinde 2027-jılı:
- Tórtkúl rayonında Jambas hám Bozataw rayonında Erkindárya kanalların betonlaw, 3 suw obekti hám 22 artezian qudıq qurıw jumısları ushın 135 milliard sum;
- Bozataw rayonındaǵı 7,5 mıń gektar jerdi ózlestiriw maqsetinde 100 milliard sum qarjı ajıratıladı;
Qaraqalpaqstanda dáslepki basqıshta shól aymaqlarında 20 mıń gektar maydanda ot-jem jetistiriw boyınsha Egipet tájiriybesi engiziledi.
Jaylawlardı ózlestiriw hám sharwashılıq joybarların ámelge asırıw ushın "Ózagrostar xolding" kompaniyasınıń shólkemlestiriwinde óz aldına "Bozataw agrostar" kompaniyası shólkemlestiriledi.
Bunda:
- AK "Xalq banki" tárepinen "Bozataw agrostar" kompaniyası ushın 2027-jıl 1-martqa shekem 50 milliard sum hám 2027-jıldıń aqırına shekem 50 milliard sum investiciya kirgiziledi;
- "Isbilermenlikti rawajlandırıw kompaniyası" akcionerlik jámiyetindegi úlesin arttırıw arqalı jańadan shólkemlestiriletuǵın qánigelesken kompaniya ushın "Uzagrostar xolding" kompaniyasınıń ustav fondına 20 milliard sum qaratıladı.
Qaraqalpaqstan Respublikası Qaraózek, Taxtakópir, Moynaq, Kegeyli, Bozataw hám Tórtkúl rayonları hákimlikleri strukturasına jaylawlardan nátiyjeli paydalanıwdı shólkemlestiriw, sharwa ot-jem bazasın bekkemlew hám sharwashılıqtı rawajlandırıw máseleleri boyınsha hákimniń birinshi orınbasarı lawazımı engiziledi.
- "Uzagrostar xolding" kompaniyası kommerciyalıq bankler menen birgelikte 2-qosımshadaǵı joqarı dáramatlı úlgi joybarlar hám shólkemlestiriwshilik ilajlardıń ámelge asırılıwın shólkemlestiredi.
"Bozataw agrostar" kompaniyası shól-jaylaw ósimlikleri tuqımların granulalaw, kapsulalaw hám ushıwshısız ushıw apparatı (keyingi orınlarda – dron) járdeminde egiw jumısların ámelge asıradı.
Bunda:
2030-jıldıń aqırına shekem 100 mıń gektar jaylaw maydanında qandım, cherkez, shoǵan, balıqkóz, danashor, juwsan, izen hám basqa da shól-jaylaw sharayatına sáykes jaylaw ósimlikleriniń tuqımları dronlar járdeminde egiliwi támiyinlenedi.
Qaraqalpaqstan Respublikasında 2022-jıl 1-yanvardan 2023-jıl 15-aprelge shekem ashıq elektron tańlawlar arqalı ijaraǵa berilgen awıl xojalıǵına mólsherlengen jer uchastkaları boyınsha qosımsha tólemlerdiń jámi muǵdarı jer uchastkasınıń normativlik bahasınıń tórt esesi hám onnan joqarı bolǵan jer ijarashılarına usı tólemdi normativlik bahasınıń bir esesine teń muǵdarda úsh jıl dawamında procenciz bólip tólewge ruxsat beriledi.
2027-jıl avgust ayına shekem junsao ósimligin jetistiriw joybarın keńeytip, ot-jem ushın keminde 600 gektar maydanda ámelge asırılıwı támiyinlenedi.
Nókis qalası, Qońırat, Qaraózek hám Taqıyatas rayonlarında 2030-jılǵa shekem bultlı texnologiyalar hám jasalma intellekt xızmetleriniń eksportı hám investiciyasın 600 million AQSH dollarına jetkeriw boyınsha baǵdarlama islep shıǵıladı.
Onda 2030-jılǵa shekem investorlardı 1 Gigavatt quwatlılıqtaǵı turaqlı elektr energiyası menen támiyinlew názerde tutılmaqta.