Fitch Ratings: Qaraqalpaqstan – ekonomikası eń jedel rawajlanıp atırǵan aymaqlardıń biri

Qaraqalpaqstan Respublikasınıń ekonomikalıq potencialı, finanslıq turaqlılıǵı hám investiciyalıq tartımlılıǵına xalıqaralıq kólemde jáne bir áhmiyetli baha berildi. Birinshi márte abıroylı xalıqaralıq reyting agentligi – Fitch Ratings Qaraqalpaqstan Respublikasınıń sırt el hám milliy valyutadaǵı uzaq múddetli kredit reytingin «BB-» dárejesinde, reyting prognozin bolsa «Turaqlı» dep belgiledi.

Bul bahalaw aymaqtıń ekonomikalıq rawajlanıw pátleri, finanslıq imkaniyatları hám keleshektegi rawajlanıw perspektivalarına xalıqaralıq finans ekspertleri tárepinen berilgen áhmiyetli baha bolıp esaplanadı.

❗️Fitch Ratings tallawlarında Qaraqalpaqstan Ózbekstannıń jedel rawajlanıp atırǵan aymaqlarınan biri sıpatında atap ótilgen. Sonday-aq, aymaqtıń finanslıq profili «aa» dárejesinde bahalanǵan.

Atap ótiw orınlı, 2026-jılı Qaraqalpaqstan ekonomikası eń tez ósip atırǵan aymaqlardan birine aylandı. Jıldıń birinshi yarımında ekonomikalıq ósiw 10,2 procentti qurap, bul kórsetkish boyınsha respublika Tashkent qalasınan keyin ekinshi orındı iyeledi.

Erisilip atırǵan bunday nátiyjeler mámleketimizde, atap aytqanda, Qaraqalpaqstanda húrmetli Prezidentimizdiń basshılıǵında ámelge asırılıp atırǵan keń kólemli ekonomikalıq reformalar, aymaqtıń óndirislik hám isbilermenlik potencialın arttırıw, investiciyalardı tartıw jáne finanslıq turaqlılıqtı bekkemlewge qaratılǵan izbe-iz ilajlardıń nátiyjesi menen tıǵız baylanıslı.

Xalıqaralıq kredit reytinginiń «BB-» dárejesinde belgileniwi qanday imkaniyatlardı ańlatadı?

Eń aldı menen, bul xalıqaralıq investorlar hám finans institutları ushın aymaqtıń ekonomikalıq jaǵdayı, finanslıq tártibi hám rawajlanıw perspektivaları haqqında áhmiyetli málimleme dáregi bolıp esaplanadı. Reytingtiń «Turaqlı» prognoz benen belgileniwi bolsa, házirgi ekonomikalıq hám finanslıq kórsetkishlerdiń jaqın keleshekte turaqlı saqlanıwı kútilip atırǵanın ańlatadı.

Bunday xalıqaralıq bahalaw Qaraqalpaqstanda investiciyalıq ortalıqtı jáne de jaqsılaw, finanslıq resurslardan paydalanıw imkaniyatların keńeytiw, jańa joybarlardı ámelge asırıw, óndiris quwatlılıqların arttırıw hám qosımsha jumıs orınların jaratıw ushın áhmiyetli tiykar bolıp xızmet etedi.

Eń áhmiyetlisi, bul nátiyje Qaraqalpaqstannıń ekonomikalıq rawajlanıw jolındaǵı izbe-iz háreketleri xalıqaralıq kólemde de tán alınıp atırǵanınan dárek beredi.