Joqarǵı Keńes Baslıǵı sanaat tarawında jumıs alıp barıp atırǵan isbilermenler menen ushırastı

Isbilermenlikke kómeklesiw búgingi kúnde ekonomikamızdıń rawajlanıwında salmaqlı úles qosıw menen birge, jańa jumıs orınların jaratıwda da áhmiyetli esaplanadı. Olardıń jumısların qollap-quwatlawda bolsa, tikkeley jaqınnan pikirlesiw arqalı mashqalalarına sheshim tabıw búgingi kúnniń talabı ekenligin ayrıqsha aytıwımız kerek.  

Usı baǵdardaǵı ámeliy jumıslardıń dawamı sıpatında Joqarǵı Keńes Baslıǵı Amanbay Orınbaev basshılıǵındaǵı sanaat tarawında jumıs alıp barıp atırǵan isbilermenler menen ushırasıw bolıp ótti. 

Onda húrmetli Prezidentimiz tárepinen elimizde sanaatı rawajlandırıw, isbilermenlikti qollap-quwatlaw, investiciyalıq joybarlardı ámelge asırıw baǵdarındaǵı Qaraqapaqstan ushın óz aldına berilgen jeńillikler haqqında keń túrde atap ótildi.

Sonıń menen birge, berilgen usınshama imkaniyatlardan nátiyjeli paydalanıp, elimizdiń sanaat potencialın arttırıw, tarawda jańa kárxanalardı iske túsiriw, import etiw arqalı alıp kelinip atırǵan ónimlerdi islep shıǵarıwdı jolǵa qoyıw, jergilikli kárxanalardıń bar bolǵan imkaniyatlarınan nátiyjeli paydalanıwdı jolǵa qoyıp, óz ara birge islesiwdi jolǵa qoyıw máseleleri sóz etildi.

Bunnan tısqarı, juwapker mákeme basshıları tárepinen salıq, bajıxana hám basqa da baǵdarlar boyınsha berilgen jeńillikler paketleri keń túrde tanıstırıldı.