Isbilermenlerdiń mashqalaları tıńlandı

Sawda-sanaat palatası Qaraqalpaqstan Respublikası basqarması imaratında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Nókis qalasındaǵı jańa joybar baslamashıları bolǵan isbilermenler menen ushırasıwı bolıp ótti.

Ushırasıwda Joqarǵı Keńes Baslıǵı elimizde húrmetli Prezidentimizdiń Qaraqalpaqstan ushın óz aldına qabıl etilgen qarar, pármanları tiykarında isbilermenler ushın jaratıp berilgen sharayatlar, mámleketimizdiń basqa regionlarında bolmaǵan jeńillikler haqqında keń túrde atap ótip, óz náwbetinde bunday imkaniyatlar nátiyjesinde isbilermenlerdiń sanı artıp, jańa jumıs orınları jaratılıp atırǵanın aytıp ótti. 

Aytıp ótilgenindey, ótken tariyxıy qısqa waqıt ishinde elimizde isbilermenlerdiń óz biznesin júrgiziwi, keńeytiwi, jańa quwatlıqlardı iske túsiriwi, regionımızdıń investiciyalıq tartımlılıǵın arttırıw boyınsha keń kólemli jumıslar ámelge asırılmaqta. Bunday iygilikli ilajlar ele de dawam ettiriledi.

Búgingi ótkerilgen ushırasıwda isbilermenlerdi qollap-quwatlaw baǵdarında ele de ámelge asırılıwı tiyis wazıypalar haqqında sóz etildi.

Isbilermenler tárepinen kóterilgen máselelerdiń basım kópshiligine ornında sheshimin tabıw ilajları kórildi. Sistemalı mashqalalar belgilep alındı. Hár bir múrájat itibardan shette qalmaytuǵınlıǵı atap ótildi.